Matiyu 9 - Jɔ Biibili ki

Mwurunku bɛɛ kene bi ki Yesu gbɛ

¹ Yesu i a pwulu de buŋ bɛɛ ru, ntiŋ i baa ki rukwuru, ntiŋ i ta awɔ kili ki ra.

² Koŋ bɛɛ ri i na mwurunku bɛɛ wu ntiŋ tɛ, niŋ bili wuru nankaraka ru. Yesu ǹʼja-i tu niŋ koŋ kiri bili afinŋ na, ntiŋ i ǹʼbi mwurunku ki tɛ tu : « Ńʼdanshuru, nʼsunfuru, mɔɔn bijɛ kiri tu-i nʼtɛ. »

³ Sariya kalimɔɔ bɛɛ ri niŋ bimaan ki rama-i waarinŋ wɔ̀ ru, kí i ǹʼbi-ri arì ciiru tu : « Ka weŋ ka i Kirinŋ tɔ li-a dɛ! »

⁴ Yesu i kí ciiru wɔ ki tɔ, ntiŋ tu kí tɛ : « Nfɛnŋ na, ka ɲakilila jɛ ka bishi i ji ábɛɛ ciiru?

⁵ Ŋì i bi mwurunku ki tɛ tu ‹ mɔɔn bijɛ kiri tu-i nʼtɛ ›, walima ŋì i bi tu wú jɔrɔkɔ tu, wú i tiri tan, ábɛɛ cirasun tu ǹʼdanwɔ bimaŋ di?

⁶ Dɔnsaŋ, míŋ a ǹʼji ábɛɛ wu tu, mínwɔ̀ i Koŋ Danshuru ki i, ńʼtu so míŋ gbɛ ka pwɔkulinŋ ka sun, ŋí i konaŋ kiri wɔ bijɛ kiri tu kí tɛ. » Niŋ ma-i, ntiŋ i ǹʼbi mwurunku ki tɛ tu : « Jɔrɔkɔ, ŋi i nʼwɔ bilifinŋ ki shi, ŋi i tiri kulu. »

⁷ Mwurunku ki i jɔrɔkɔ, wú i tiri awɔ mani nu.

⁸ Konaŋ kiri niŋ ja-i waarinŋ wɔ̀ ru, kɛmi i de kí ru, kí i Kirinŋ gbɛ-ri, ninwɔ̀ ki ka so ka bishi wɔri-i konanmini tɛ.

Matiyu dɔri bi ki Yesu gbɛ

⁹ Yesu po san-i niŋ mani nu, ntiŋ fwuudera ki i shuru bɛɛ sɔɔ ja ɲinisarakɔlɔtɔnŋ kiri wɔ baara mamaŋ ki ru, niŋ shuru ki tɔ ki wuru tu Matiyu. Ntiŋ i ǹʼbi niŋ tɛ : « Ǹʼpa míŋ cɛfan. » Matiyu i jɔrɔkɔ, ntiŋ i ǹʼpa Yesu cɛfan.

¹⁰ Niŋ kɔɔtɛ, jibi bɛɛ, Yesu wuru nufinŋ nu-a Matiyu wɔ mani nu. Ɲinisarakɔlɔtɔnŋ mwɔɔnna fa bi kulinŋ matɔnŋ mwɔɔnna tɔri ri i na sɔɔ ntiŋ fa awɔ kalindaŋ kiri fan niŋ nufinŋ nunama ki tɛ sɛbɛ.

¹¹ Farinsiyɛnŋ kiri bɛɛ ri niŋ ja-i waarinŋ wɔ̀ ru, kí tu Yesu wɔ kalindaŋ kiri tɛ tu : « Nfɛnŋ na, ábɔɔ kalimɔɔ ki i nuŋ nu-ni ɲinisarakɔlɔtɔnŋ kiri fa bi kulinŋ matɔnŋ kiri fan? »

¹² Yesu niŋ wulu ki rama-i, ntiŋ tu kí tɛ tu : « Koŋ kenemaan kiri maku janmatɔnŋ na kì, nka kiratɔnŋ kiri maku i ǹʼna.

¹³ Á ta á miiri Kirinŋ wɔ wulu ki ru wulu kari kɔri ki sun tu : ‹ A ábɛɛ ámaŋ sunmakwulupa, míŋ i niŋ tɛ, ŋì i fwuu ábɔɔ saraka wɔrimaan sun ńʼtɛ. › Míŋ na koŋ telimaan kiri dɔri kì, duu bijɛmatɔnŋ kiri. »

Yesu ɲaanbi wɔ̀ tan-i sunŋ de bi ki sun

¹⁴ Niŋ kɔɔtɛ, Wutɔnŋ Yuhana wɔ kalindaŋ kiri i na Yesu ranɔri tu : « Nfɛnŋ ncin-a yibɛɛ fa Farinsiyɛnŋ kiri i sunŋ de-ri, ábɔɔ kalindaŋ kiri dumiŋ sunŋ de-a kì? »

¹⁵ Yesu i kí rupwulu tu : « Marishinŋ ki wɔ wɔshuru kiri ra so arì ɲaannuŋunu-i, ŋì i kí fa ntiŋ tu arìmaŋ fan wa? Waaci yirira i nmaŋ, ntiŋ a na shi san kí ra. Niŋ jibi kiri ra, kí a na sunŋ de-ri.

¹⁶ Koŋ juulinŋ ŋunaŋ bwulu sɔɔ-ra, ŋi i juulinŋ bwuumaan nada kì. A niŋ ma, juulinŋ ŋunaŋ bwulu ki a juulinŋ bwuumaan ki cɛɛn-ɛ, ŋì i ǹʼgbɛri. Niŋ ɲaan ki tɛ, juulinŋ bwuumaan ki gbɛrika ki a juu, ŋì i fwuu a jɔnɔ ki sun.

¹⁷ Koŋ fani dunfɛnŋ juuraŋ bo-a foroko bwuumaan ni nu kì. A niŋ ma, dunfɛnŋ juuraŋ ki borama ki a foroko bwuumaan kiri gbɛri, dunfɛnŋ ki i kɔnkɔli, foroko kiri i ji-a li. Niŋ na, dunfɛnŋ juuraŋ ki kakan-i foroko ŋunaŋ ni nu, a niŋ ma, ǹʼtɔri li-a kì. »

Yawutu kiri ŋununtiŋ bɛɛ danmari kene bi ki, niŋ fa mari wɔ̀ a gbɛ pa-i Yesu wɔ juulinŋ tɔnŋ na ki ra

¹⁸ Ŋì i Yesu tu wulu ki ra kí tɛ, Yawutu kiri ŋununtiŋ bɛɛ i na nmaŋ. Ntiŋ i a kwushiri Yesu fɛ, ntiŋ i ǹʼbi tu : « Míŋ danmari ki beeni-i kaa dɔɔ, míŋ i miŋ nafɛ-a, na nʼgbɛ bili ǹʼsun, ŋì a ŋmɛni. »

¹⁹ Yesu i jɔrɔkɔ, ntiŋ i ǹʼpa Yawutu ŋununtiŋ ki cɛfan, ntiŋ fa awɔ kalindaŋ kiri.

²⁰ Niŋ waari ru, mari bɛɛ wuru konaŋ ki ru nmaŋ, juwu kɔbali kira wuru niŋ na kabi jiri bwununfuuli, niŋ i a kpari Yesu tɛ, nmari i po ntiŋ kɔɔtɛ, nmari i a gbɛ pa ntiŋ sunjuulinŋ ki tɔnŋ ki ra.

²¹ Niŋ mari ki ǹʼbo wuru a ciiru tu : « A míŋ so ńʼgbɛ pa bantenŋ tan-i ntiŋ wɔ juulinŋ ki ra, míŋ a kene. »

²² Yesu i a ɲaannupwulu, ntiŋ i mari ki ja, ntiŋ tu nmari tɛ : « Ńʼdanmari, tɔnnafurubi kila, mɔɔn bilinabi ki nʼkene-i. » Mìŋ manaanŋ tenŋ ki ru, mari ki i kene.

²³ Yesu na-i ta so Yawutu ŋununtiŋ ka wɔ mani ki ru, ntiŋ i kpilinŋ fyɛtɔnŋ kiri fa konaŋ ki ja mani ki bataa ru, kí i wulu ki mwɔ-ni,

²⁴ ntiŋ tu kí tɛ tu : « Á á san nmaŋ, maannaanŋ ki beeni kì, ŋì i ɲinintan-a. » Niŋ bimaan ki sun, konaŋ ki i yɛtan bo-ri Yesu sun.

²⁵ Kí konaŋ ki bataa po-i taanna waarinŋ wɔ̀ ru, Yesu i de fu ki ru, ntiŋ i maannaanŋ ki pa a gbɛ sun, ŋì i ŋmɛni.

²⁶ Niŋ bi mamaan ki wulu ki i niŋ sɔɔta ki mani ki bataa rapo.

Ɲaanfwuu fuuli bɛɛ kene bi ki Yesu gbɛ

²⁷ Yesu i po san niŋ mani nu. Ntiŋ tirira ki, ɲaanfwuu fuuli bɛɛ i arì bo ntiŋ cɛfan, kí i fali-li, kí i ǹʼbi-ri tu : «  Dawuda danshuru, yi sunmakwulupa! »

²⁸ Yesu ta-i so kulu waarinŋ wɔ̀ ru, ɲaanfwuu fuuli ki i arì kpari ntiŋ tɛ, ntiŋ i kí ranɔri tu : « Ábɛɛ bili-i ǹʼna tu míŋ a so ábɛɛ ɲaninaŋ kiri rawwulu-i ncinŋ wa? » Kí i ntiŋ nupwulu tu : « Aawe, Ŋuntiŋ. »

²⁹ Niŋ na, Yesu i a gbɛ pa kí ɲaninaŋ kiri ra, ntiŋ i ǹʼbi : « Ábɛɛ bili-i míŋ na ɲaan wɔ̀ tɛ, ŋì ma ŋì i kɛɲɛ niŋ wu. »

³⁰ Kí ɲaninaŋ kiri i nawwulu. Nka Yesu i ǹʼbi furu kí tɛ tu kí fa ncusun koŋ i niŋ tɔ kì.

³¹ Nka kí po san-i fu ki ru mani wɔ̀ ru, kí i Yesu wulu ki sunjo niŋ sɔɔta ki mani ki bataa ru.

Bubu bɛɛ kene bi ki Yesu gbɛ

³² Niŋ shuru fuuli ki wuru po-a waarinŋ wɔ̀ ru, konaŋ kiri i na ɲinijɛtiŋ bɛɛ wu Yesu tɛ, niŋ ɲinijɛ ki niŋ koŋ ki ji wuru bubu.

³³ Yesu i ɲinijɛ ki kalikali, shuru ki i a bo wulubi sun. Niŋ jamaan ki i bo konaŋ ki bataa tɔnŋ sun, kí i ǹʼbi-ri tu : « Ka bi ka bishi ja ja-i Isirayɛli kɛniŋ ki ru fɛsɛfɛsɛ sun kì. »

³⁴ Nka Farinsiyɛnŋ kiri i ǹʼbi-ri tu : « Wú i ɲinijɛ kiri kalikali-la ɲinijɛ kiri wɔ ŋununtiŋ ki wɔ so ki wu. »

Yesu wɔ konaŋ ki sunmakwulupa bi ki

³⁵ Yesu wuru ta-a kili sinaŋ kiri fa kili pyaanŋ kiri ra, ntiŋ i konaŋ ki kali-li Yawutu kiri wɔ kalinfu kiri ru, ntiŋ i kirinpɔlila Masabi ki Wulujii ki sunjo-ri, niŋ fa ntiŋ i konaŋ kiri wɔ kira kiri fa kɔ́ɔ́ bɔlɔmabi kwuru ki bataa kene-ni.

³⁶ Ntiŋ konaŋ ki ja-i waarinŋ wɔ̀ ru, kí makwulu i ntiŋ pa, sabu kí yɛli wuru-i, daŋ i kɔ kí sun miŋ tu saa ri, neetɔnŋ nwɔ̀ri ra kì.

³⁷ Niŋ ki ra, ntiŋ i ǹʼbi awɔ kalindaŋ kiri tɛ tu : « Bilaŋ tɛri wɔ ki mwɔ-i, nka bilaŋ tɛritɔnŋ kiri nakuru-i,

³⁸ niŋ ki ra, á jitiŋ ki rafɛ tu ntiŋ cinŋ matiiri cin, kí i ta awɔ bilaŋ ki tɛri. »