Matiyu 7 - Jɔ Biibili ki

Kiti kwuru bi ki nʼkaashi ki sun

¹ Yesu tu kí tɛ : « Á fa kiti kwuru koŋ sun kì, nwɔma Kirinŋ yɛrima ki fa kiti kwuru ábɛɛ sun kì.

² Sabu ábɛɛ i koŋ pyɛ kiri wɔ kiti ki kwuru-ra ɲaan wɔ̀ tɛ, ábɔɔ ki yɛrima ki a kwuru mìŋ ɲaan tenŋ ki tɛ, ábɛɛ i koŋ pyɛ kiri wɔ ki ki-a finŋ wɔ̀ sun, ábɔɔ ki yɛrima ki a ki mìŋ finŋ tenŋ ki sun.

³ Nfɛnŋ na, jɛ pyaanŋ wɔ̀ i miŋ tindaŋ ki ɲaninaŋ ki sun, miŋ ɲaniŋ i ji niŋ na, suubulinŋ wɔ̀ i mɔɔn ki sun, miŋ dumiŋ niŋ ja-a kì?

⁴ Miŋ a so ǹʼbi-i nʼtindaŋ ki tɛ : ‹ Ncusun ŋí jɛ san nʼɲaninaŋ sun ›, niŋ i faa suubulinŋ i ji mɔɔn ki sun dɔɔkunŋ?

⁵ Wulufuulibitɔnŋ ki shɛɛli dɛ, suubulinŋ ki san nʼɲaninaŋ ki sun fɔlɔ, a niŋ ma, miŋ a so maannajaka shɔ-i, ŋi i nʼtindaŋ ki ɲaninaŋ ki sun jɛ ki san.

⁶ Nwɔma kwuu kiri fa na arì pwulu yìrì i ábɛɛ ɲiin kì, á fa finŋ wɔlinŋ ki kee bo yìrì tɛ kì. Niŋ fa, nwɔma cɛ kiri fa na áwɔ ɲɔɔnniŋ kpaafuru kiri rushɛ shɛ de arì kanfɛ kì, á fa yìrì kee bo yìrì tɛ kì. »

Kirinŋ nafɛ bi ki

⁷ Yesu tu : « Á ǹʼnafɛ, ŋì a wɔri ábɛɛ tɛ, á ǹʼceeli, ábɛɛ a ǹʼkila, á fu ki tɔnŋ nakɔkɔ, ŋì a nawwulu ábɛɛ tɛ.

⁸ Sabu koŋ woo koŋ i ǹʼnafɛ-a, ŋì i wɔri-ra ntiŋ tɛ, nwɔ̀tiŋ i ǹʼceeli-la, nintiŋ i ǹʼkila-a, nwɔ̀tiŋ i faatɔnŋ ki buŋ ki sunkɔkɔ-a, ǹʼtɔnŋ ki i nawwulu-la nintiŋ tɛ.

⁹ Nkɛnŋ ábɛɛ ru, tu ntiŋ daŋ ki bwuru rafɛ ntiŋ gbɛ, tu ntiŋ a kwɔ shi wɔri a daŋ ki tɛ bwuru ki ta ru?

¹⁰ Walima a daŋ ki yɛrinŋ nafɛ ntiŋ gbɛ, tu ntiŋ a myɛɛn wɔri ǹʼtɛ?

¹¹ Ábɛɛ konanmini, ábɛɛ wɔ̀ri juu-u, a ábɛɛ ji finŋ shɔɔrinŋ tɔ-a, á i niŋ wɔri-ri á daŋ kiri tɛ, ábɛɛ bili ǹʼna tu ábɛɛ Tiŋ wɔ̀ i kirinpɔli ki ra, tu niŋ a finŋ shɔɔrinŋ wɔri a rafɛtɔnŋ kiri tɛ, ŋì i fwuu ábɔɔ ki sun kì wa?

¹² Ábɛɛ i ǹʼtɛ konaŋ kiri nwɔ̀ ma ábɛɛ tɛ, ábɛɛ yɛrima kiri niŋ bishi ma kí tɛ sɛbɛ. Musa wɔ sariya ki fa cintɔnŋ kiri wɔ sɛbɛ kiri i niŋ kalinŋ ki wɔri-ra.

Demantɔnŋ pyaanŋ ki bi ki

¹³ Á de demantɔnŋ pyaanŋ ki ra, sabu saa wɔ̀ i koŋ bo-a halikimaŋ ki ru, niŋ demantɔnŋ ki nagbɛ-i, ǹʼsaa ki i ji rapili, koŋ mwɔɔnna i ji de-a ǹʼfan.

¹⁴ Nka saa wɔ̀ i koŋ de-a ɲaninkulutɔnbi ki ru, niŋ demantɔnŋ ki nakuru-i, ǹʼsaa ki i ji nakuru sɛbɛ, ǹʼkilatɔnŋ kiri mwɔ kì.

Jirinŋ fa a daŋ ki bi ki

¹⁵ Á á yɛri cɔye cintɔnŋ purubitɔnŋ kiri ra, sabu kí ji na-a ábɛɛ tɛ, kí i arì yɛri ji-a saa ri sali, niŋ i faa kpalinŋ juumaan ni i ji-i.

¹⁶ Ábɛɛ ra kí tɔ arì mabi kiri ra. Koŋ i ɛrɛnsɛnŋ daŋ kila-a cii jirinŋ na wa? Walima nɔmaan i kila-a shɔ jirinŋ na wa?

¹⁷ Niŋ ɲaan ki tɛ, jirinŋ shɔɔrinŋ bataa i daŋ shɔɔrinŋ pa-a, jirinŋ jɛ ki i daŋ jɛ pa-ri.

¹⁸ Daŋ jɛ so-a kila-i jirinŋ shɔɔrinŋ na kì, mìŋ ɲaan tenŋ ki tɛ, daŋ shɔɔrinŋ kila-a jirinŋ jɛ ra kì.

¹⁹ A jirinŋ finŋ woo finŋ ji daŋ shɔɔrinŋ pa-a kì, niŋ i kwuru bo-a tuu ru.

²⁰ Niŋ ki ra, ábɛɛ ra so cintɔnŋ purubitɔnŋ kari tɔ-i arì mabi kiri ra. »

Kirinŋ wɔ Masabi ki ru detɔnŋ kiri bi ki

²¹ Yesu tu sɛbɛ : « Nwɔ̀ri bataa i ǹʼbi-a míŋ tɛ tu : ‹ Ŋuntiŋ, Ŋuntiŋ ›, nini bataa ra de kirinpɔlila Masabi ki ru kì dɛ! Míŋ Tiŋ wɔ̀ i kirinpɔli ki ra, nwɔ̀ri i niŋ dintɛ bi ki ma-a, niŋ kiri a de ǹʼnu.

²² Niŋ shikaŋ ki ru, koŋ mwɔɔnna a ǹʼbi míŋ tɛ tu : ‹ Ŋuntiŋ ki, Ŋuntiŋ ki, yibɛɛ cintɔnbi ki ma, yi i ɲinijɛ kiri kwɔ po san konaŋ kiri ru miŋ tɔ ki wu kì wa? Yibɛɛ botɔnsunbi mwɔɔnna ma miŋ tɔ ki baraka ra kì wa? ›

²³ Niŋ shikaŋ, míŋ a na ǹʼbi niŋ koŋ kiri tɛ konaŋ ki bataa ɲaanna, ńʼtu : ‹ Míŋ ábɛɛ tɔ-a kì dɛ! Á á san ńʼkankantɛ, ábɛɛ bijɛmatɔnŋ kari. › »

Fu tanka ɲaan fuuli bi ki

²⁴ Ntiŋ tu : « Niŋ ki ra, koŋ finŋ woo finŋ i ka wulu kari rama-a, ntiŋ i ta yìrì ma mìŋ ɲaan ki tɛ, nintiŋ i miŋ tu koŋ ɲakilitiŋ, nwɔ̀ awɔ fu tan-i faa sun.

²⁵ Kirinŋ jiitɛɛ i na, ju ki i su kiri faa, ŋì i mani ki bataa shi, niŋ fa faa sinaŋ i po, yìrì i fu ki curu, nka ǹʼfɛɛn kì, sabu ǹʼtan wuru faa sun.

²⁶ Nka koŋ finŋ woo finŋ i ka wulu kari rama-a, ntiŋ dumiŋ yìrì ma-a arì ɲaan ki tɛ kì, nintiŋ i miŋ tu koŋ ɲakili bali, nwɔ̀ awɔ fu tan-i ɲɛniŋ sun.

²⁷ Kirinŋ ki i na, ju ki i su kiri faa, ŋì i mani ki bataa shi, niŋ fa faa sinaŋ i po, yìrì i fu ki curu, ŋì i bwulubɛli bo amaŋ nu. »

²⁸ Yesu kɔ-i awɔ kalinŋ ki ra waarinŋ wɔ̀ ru, ntiŋ wɔ kalintanka ɲaan ki i bo konaŋ ki tɔnŋ sun.

²⁹ Yesu wuru konaŋ ki kali-la miŋ tu kɔ́ɔ́ sariya kalimɔɔ kiri kì, nka baraka wuru ntiŋ wɔ kalinŋ ki ru, sabu ǹʼwuru po-a ntiŋ yɛrima ki ru kì.