Matiyu 1 - Jɔ Biibili ki

Yesu cunsaa ki

¹ Yesu Kirisa po-i koŋ wɔ̀ri ru, nini tɔ kiri i kari i. Yesu i masa Dawuda nupo o, masa Dawuda i ji Aburahamu nupo o.

² Aburahamu Ishaka ji-i, Ishaka i Yakuba ji, Yakuba i Yuda fa a tindaŋ kiri ji.

³ Yuda Farɛsi fa Nsara ji-i, Tamaari wuru nini ɲiŋ ki i. Farɛsi i Eshirɔmu ji, Eshirɔmu i Aramu ji.

⁴ Aramu Aminadabu ji-i, Aminadabu i Naasɔn ji, Naasɔn i Salimɔn ji.

⁵ Salimɔn Boonsi ji-i, Arahabu wuru niŋ jiɲiŋ ki i. Boonsi i Yobɛdi ji, Uruti wuru ninwɔ̀ jiɲiŋ ki i. Yobɛdi i Yesayi ji.

⁶ Yesayi masa Dawuda ji-i. Masa Dawuda i masa Solomani ji, ninwɔ̀ jiɲiŋ ki wuru Uri wɔ mari i sun.

⁷ Masa Solomani Orobowamu ji-i, Orobowamu i Abiya ji, Abiya i Asafu ji.

⁸ Asafu Yosafati ji-i, Yosafati i Yorowamu ji, Yorowamu i Osiyasi ji.

⁹ Osiyasi Yotamu ji-i, Yotamu i Akasi ji, Akasi i Esikiyasi ji.

¹⁰ Esikiyasi Manase ji-i, Manase i Amɔn ji, Amɔn i Yosiyasi ji.

¹¹ Yosiyasi Yekoniyasi fa a tindaŋ pyɛ kiri ji-i. Niŋ waaci ki ru, kí Isirayɛlidaŋ kiri pa tiri-i jonbi ki ru Babilɔni kɛniŋ ki ru.

¹² Isirayɛlidaŋ kiri somaan ki kɔɔtɛ Babilɔni : Yekoniyasi i kila niŋ i Salatiyɛli ji, Salatiyɛli i Nsorobabɛli ji.

¹³ Nsorobabɛli Abiyudi ji-i, Abiyudi i Eliyakimu ji, Eliyakimu i Ansɔɔri ji.

¹⁴ Ansɔɔri Sadɔki ji-i, Sadɔki i Akimu ji, Akimu i Eliyudi ji.

¹⁵ Eliyudi Eleyansaari ji-i, Eleyansaari i Matan ji, Matan i Yakuba ji.

¹⁶ Yakuba Yusufu ji-i. Yusufu wɔ mari ki tɔ ki i ji tu Mariyamu. Niŋ Mariyamu tɔ ki Yesu ji-i, ninwɔ̀ i dɔri-ra tu Kirisa.

¹⁷ Niŋ ɲaan ki tɛ, ŋì i shi Aburahamu sun, ŋì i na bo masa Dawuda sun, sɛri bwununpyiiraŋ fwuude-i. Ŋì i shi masa Dawuda sun, ŋì i ta so Isirayɛlidaŋ kiri pa tiri waari ki sun jonbi ki ru Babilɔni kɛniŋ ki ru, sɛri bwununpyiiraŋ tɔri i ji fwuude. Ŋì i shi Isirayɛlidaŋ kiri pa tiri waari ki sun jonbi ki ru Babilɔni, ŋì i ta so Kirisa ji ki sun, sɛri bwununpyiiraŋ i ji fwuude sɛbɛ.

Yesu ji bi ki

¹⁸ Dɔnsaŋ, nwɔ̀ i Yesu Kirisa ji bi ki i, niŋ ma-i ɲaan wɔ̀ tɛ, niŋ i kaa : Mariyamu, ninwɔ̀ i ntiŋ ɲiŋ ki i, niŋ sunpamaan wuru Yusufu gbɛ. Kí dɛbɛ ki jɛŋ, Mariyamu wuru cii wu, Ɲiniwɔlinŋ ki wɔ so ki baraka ra.

¹⁹ Yusufu wuru koŋ telimaan a. Ntiŋ ǹʼtɔ-i waarinŋ wɔ̀ ru, tu afɔɔn mari sunpa ki ciitiŋ i, ntiŋ i ji ǹʼtɛ a i a kaan nmari tɛ du ru, nwɔma nmari tɔ fa li kì.

²⁰ Jibi bɛɛ, ŋì i Yusufu tu niŋ bi kiri miiri-ra, ntiŋ i Ŋuntiŋ Kirinŋ wɔ mɛlɛkɛn ki bɛɛ ja jii ru, niŋ i ǹʼbi ntiŋ tɛ tu : « Yusufu, masa Dawuda nupo, fa kɛni Mariyamu shi bi ki ra nʼwɔ mari ki, sabu cii wɔ̀ i nmari ru, niŋ kila-i Ɲiniwɔlinŋ ki wɔ so ki baraka ra.

²¹ Nmari ra na danshuru ji. Ŋi i na ǹʼtɔ ki ye tu Yesu, sabu ŋì a na awɔ konanbi ki mwu san arɔɔ bijɛ kiri wu. »

²² Niŋ bi kiri bataa ma-i, nwɔma Ŋuntiŋ Kirinŋ wɔ cintɔnŋ ki wulu wɔ̀ bi wuru-i, niŋ i ma a ɲaan tɛ.

²³ Sɛli ki ra, Ŋuntiŋ Kirinŋ ǹʼbi wuru awɔ cintɔnŋ ki tɔnŋ na tu : « Maannaanŋ shurubitɔbali a na danshuru ji, niŋ daŋ ki a na dɔri tu Emanuwɛli. » Emanuwɛli kɔri ki i tu Kirinŋ yibɛɛ fan.

²⁴ Yusufu ŋmɛni-i. Niŋ kɔɔtɛ, Ŋuntiŋ Kirinŋ ki wɔ mɛlɛkɛn ki ǹʼbi-i ntiŋ tɛ ɲaan wɔ̀ tɛ, ntiŋ i ǹʼma ninkunŋ. Ntiŋ i Mariyamu cɛn awɔ mari i.

²⁵ Nka Yusufu fa Mariyamu dɛbɛ kì, fɔ ŋì i ta so nmari jɛri ki sun. Nmari i na jɛri danshuru ra, Yusufu i ǹʼtɔ ki ye tu Yesu.