Galasitɔnŋ kiri 1 - Jɔ Biibili ki

Pooli wɔ coolinŋ ki Galasitɔnŋ kiri tɛ

¹ Ka sɛbɛ ka po-i míŋ Pooli gbɛ, mínwɔ̀ i Yesu Kirisa wɔ cindaŋ i, ninwɔ̀ ma konaŋ ni sababu ra walima koŋ baraka ra kì, nka ǹʼdi-i Yesu Kirisa tɛ niŋ fa a Tiŋ Kirinŋ tɛ, ninwɔ̀ ntiŋ ŋmɛni po san-i konkwuu kiri kanfɛ.

² Tindaŋ wɔ̀ri i míŋ fan kwumaŋ, míŋ fa nini bataa i ka sɛbɛ ka bo ta-a ábɛɛ Galasi sɔɔta ki ru bilinatɔnŋ kiri tɛ.

³ Yibɛɛ Tiŋ Kirinŋ niŋ fa Ŋuntiŋ Yesu Kirisa ɲaanfɛfili fa shɔɔrinŋ ma á tɛ.

⁴ Kirisa a yɛri ki wɔri-i yibɔɔ bijɛ kiri ŋunfɛ, nwɔma a i yibɛɛ po san ka juniɲa ka ru bijɛ kiri bataa ru, ŋì i kɛɲɛ Tiŋ Kirinŋ dintɛ bi ki wu,

⁵ Tiŋ Kirinŋ gbɛ waarinŋ bataa ru. Amiina.

Wulujii ki i tenŋ pe e

⁶ Kirinŋ wɔ̀ ki ábɛɛ dɔri-i Yesu Kirisa baraka ra, ábɛɛ pwulu ki jona jona, á i á san niŋ cɛfan, á i ǹʼpa Wulujii tɔri cɛfan, niŋ bo-i míŋ tɔnŋ sun kusɛbɛ.

⁷ Sɛli ki ra, Wulujii tɔri nmaŋ kì, nka konaŋ kiri bɛɛ ri i ǹʼtɛ arì i ábɛɛ fɔni. Kí i ǹʼtɛ arì i Kirisa wɔ Wulujii ki rapwulu ji ǹʼtɔri kwuru u.

⁸ Nka, a yibɛɛ yɛrima kiri walima kirinpɔlila mɛlɛkɛn ki bɛɛ na Kirinŋ wɔ Wulujii tɔri bi ábɛɛ tɛ, nwɔ̀ fa yibɔɔ ki po kì, Kirinŋ nintiŋ danka.

⁹ Yibɛɛ ǹʼbi-i ɲaan wɔ̀ tɛ kɔ, míŋ a ńʼpwulu mìŋ tenŋ ki sun sɛbɛ, ńʼtu ábɛɛ Kirinŋ wɔ Wulujii wɔ̀ rama-i yibɛɛ gbɛ, á i ji ǹʼtɛ, a koŋ woo koŋ na Kirinŋ wɔ Wulujii tɔri bi ábɛɛ tɛ, nwɔ̀ fa niŋ tenŋ i kì, ńʼtu Kirinŋ nintiŋ danka.

¹⁰ Niŋ na, míŋ i ǹʼtɛ ŋí i ńʼyɛri bidi konaŋ ni tɛ daa Kirinŋ tɛ? Walima míŋ ǹʼtɛ ŋí i konaŋ ni dintɛ bi ma daa Kirinŋ dintɛ bi? Á míŋ ji wuru konaŋ ni dintɛ bi ma-a, míŋ wuru-ra ji faa Kirisa tɛ baara matɔnŋ i kili kì.

Ŋuntiŋ ki Pooli dɔri-i ɲaan wɔ̀ tɛ

¹¹ Ńʼtindaŋ ni, míŋ i ǹʼtɛ ábɛɛ i nwɔ̀ tɔ, niŋ i kaa : Míŋ i Kirinŋ wɔ Wulujii wɔ̀ bi-i ábɛɛ tɛ, niŋ po konanmini gbɛ kì.

¹² Sabu, míŋ ǹʼkila koŋ gbɛ kì, koŋ tɔri dantenŋ dumiŋ míŋ kali ǹʼna kì, nka Yesu Kirisa yɛrima ki ǹʼji-i míŋ wu.

¹³ Míŋ wuru ɲaan wɔ̀ tɛ sun Yawutu kiri wɔ Kirinŋ saa ki fan, ábɛɛ niŋ nama-i. Míŋ wuru Yesu wɔ bilinatɔnŋ kwuru kiri cɔɔri-ra kusɛbɛ, nwɔma ŋí i kí haliki.

¹⁴ Nwɔ̀ i Yawutu kiri wɔ Kirinŋ saa tirirama ki i, míŋ wuru ńʼwaarama kiri mwɔɔnna jan-a niŋ na, ńʼcunadimaan i ji wuru ńʼtiŋ cɛɛnni kiri wɔ ladaŋ na bi kiri ra kusɛbɛ.

¹⁵ Nka Kirinŋ míŋ ɲaannashi-i, niŋ i faa míŋ ji-ri sun kì. Kirinŋ wɔ shɔɔrinŋ ki baraka ra, ŋì i míŋ dɔri ŋí i ji a tɛ baara matɔnŋ i.

¹⁶ Niŋ ki ra, ŋì a Danshuru ki ji-i míŋ wu, nwɔma ŋí i niŋ Wulujii ki sunjo shiya tɔri kiri tɛ mani wɔ̀ ru, míŋ konanmini wɔ racinwulu sunsuu kili kì.

¹⁷ Nwɔ̀ri ji wuru Yesu wɔ cindaŋ ni i míŋ jɛŋ, míŋ ńʼyɛri kɔli ta-a nini tɛ Yerusalɛmu kì, nka míŋ tiri-i shuu Arabu kɛniŋ ki ru, niŋ kɔɔtɛ, ŋí i ńʼpwulu na Damasi kili ki ru.

¹⁸ Niŋ bataa kɔɔtɛ, jiri byaŋ i fwuude, míŋ i kila ŋí i ta Yerusalɛmu, nwɔma ŋí i ta Pyɛɛri tɔ, ŋí i sunŋ bwununtaanŋ ma niŋ fan.

¹⁹ A niŋ fa Ŋuntiŋ ki pwaŋ Yakuba ki ji-i kì, míŋ Yesu wɔ cindaŋ tɔri ja kili kì.

²⁰ Míŋ i nwɔ̀ sɛbɛ-a, Kirinŋ i míŋ shɛɛri, tu puru dantenŋ niŋ nu kì.

²¹ Niŋ kɔɔtɛ, míŋ i de tiri Siri, niŋ fa Silisi kɛniŋ kiri ru.

²² Bilinatɔnŋ kwuru wɔ̀ri wuru Yude sɔɔta ki ru, nini wuru míŋ tɔ-a sun kì.

²³ Kí ǹʼnama bantenŋ tan wuru konaŋ kiri tɔnŋ na, tu koŋ wɔ̀ wuru bilinatɔnŋ kiri cɔɔri-ra, tu niŋ yɛrima ki konaŋ kiri dɔri na-a bilinabi ki ru, ntiŋ wuru ǹʼtɛ a i ninwɔ̀ haliki.

²⁴ Niŋ ɲaan ki tɛ, kí wuru baraka bi-a Kirinŋ tɛ míŋ bira.