Efɛsitɔnŋ kiri 5 - Jɔ Biibili ki

Bilinatɔnŋ kiri kakan-i kí i tiri manisarinŋ ki tɛ ɲaan wɔ̀ tɛ

¹ Dɔnsaŋ, miŋ tu ábɛɛ i Kirinŋ daŋ ni i, á bi i ji di ǹʼtɛ, á ji ǹʼnakitiiri i.

² Ábɛɛ mabi kiri bataa ru, á á kaashi ki bidi á tɛ ǹʼbataa ru, miŋ tu Kirisa i ábɛɛ bidi-a a tɛ ɲaan wɔ̀ tɛ, ŋì a yɛri ki wɔri-i saraka Kirinŋ tɛ yibɛɛ ŋunfɛ, niŋ fani i di Kirinŋ tɛ.

³ Nankulunbi ki fa nɔɔkɔnɔbi kwuru ki bataa fa fyikatinbi ki dantenŋ tɔ fa nama ábɛɛ faninmwuŋ kì, nini fu Kirinŋ wɔ wɔlinŋ kiri kanfɛ kì.

⁴ Ábɔɔ wulu kulinŋ bi ki fa áwɔ myɛɛnbi wulu bi ki fa áwɔ janfarawulu sunfurumaan ki shɔ sɛbɛ kì dɛ! Finŋ wɔ̀ fu-i, niŋ i ábɔɔ baraka birama ki i Kirinŋ tɛ.

⁵ Á ka tɔ á i ǹʼfɔɔ, tu nankulinŋ kiri fa koŋ nɔɔmaan kiri fa koŋ fyikatiŋ kiri dantenŋ wɔ lu Kirisa fa Kirinŋ wɔ Masabi ki ru kì, kí i miŋ tu pɛli tantiiri.

⁶ Á fa ncusun koŋ i á sunnɛɛn wulu tawɔ ri wu kì, sabu niŋ wulu bishi kiri i ncin-a Kirinŋ wɔ tɔnkwulu ki i so-ri awɔ wulu pabali kiri sun.

⁷ Niŋ ki ra, á fa de kɔ́ɔ́ toŋ ki ru kì, á fa dɛbɛ kí fan arɔɔ bi kulinŋ kiri ru kì.

⁸ Ábɛɛ wuru mancinŋ i sun, nka dɔnsaŋ ábɛɛ i manisarinŋ i Ŋuntiŋ ki ra. Niŋ na, á tiri miŋ tu manisarinŋ daŋ ni.

⁹ Shɔɔrinŋ kwuru ki fa telibi ki fa sɛli ki i po-a manisarinŋ ki ru.

¹⁰ Á á banba, á i Ŋuntiŋ ki dintɛ bi kiri ɲaan ceeli, á i yìrì tɔ.

¹¹ Konaŋ kiri i bi wɔ̀ri ma-a mancinŋ ki ru, á fa á kanŋ de nini nu fyewu kì, nka á kɔ́ɔ́ bi kulinŋ kiri ji kí wu manisarinŋ tɛ.

¹² Sabu niŋ koŋ kiri i bi wɔ̀ri ma-a radu ru, hali niŋ bi kiri rakali ki i ɲaankwunŋ i.

¹³ Kí i bi wɔ̀ri ma-a radu ki ru, waarinŋ wɔ̀ ru ábɛɛ nini ji manisarinŋ ki tɛ, yìrì ɲaan i tɔ-a, sabu finŋ woo finŋ ja ji manisarinŋ tɛ, niŋ i napwulu ji-a manisarinŋ i.

¹⁴ Niŋ ki ra, ŋì i bi tu : « Minwɔ̀ i ɲinintan-a, ŋmɛni! Ŋmɛni po san konkwuu kiri kanfɛ, nwɔma Kirisa i manisarinŋ po nʼtɛ. »

¹⁵ Á á yɛri cɔye, á i á tirikanŋ ki tɔ. Á fa ji ɲakili bali li i kì, nka á ji ɲakilitiŋ ni i.

¹⁶ Kirinŋ waaci wɔ̀ wɔri-i ábɛɛ tɛ, á baara shɔɔrinŋ ma niŋ ciiru, sabu jiŋ sunŋ ki shɔ kì.

¹⁷ Niŋ ki ra, á fa ji koŋ ɲakili bali li i kì, nka á á banba, á i á tɔɔnye, nwɔma á i Ŋuntiŋ ki dintɛ bi ki tɔ.

¹⁸ Á fa á yɛri ɲaannafini lɔ wu kì, niŋ i koŋ ɲini ki li-a, nka á faa Ɲiniwɔlinŋ ki ra.

¹⁹ Á shupɔri ámaŋ tɛ, ŋì i po Kirinŋ tɛ shu kiri ru, niŋ fa Kirinŋ wɔ shu kiri ru, niŋ fa Ɲiniwɔlinŋ ki shu wɔ̀ri wɔri-i. Á niŋ shu kiri pɔri Ŋuntiŋ ki tɛ, á i ǹʼgbɛ á ciiru ki bataa wu.

²⁰ Á coolinŋ wɔri Tiŋ Kirinŋ tɛ waarinŋ bataa ru, finŋ bataa bira yibɛɛ Ŋuntiŋ Yesu Kirisa tɔ ra.

Mari fa a shinŋ bi ki

²¹ Ábɛɛ wɔ̀ri i kɛni-na Kirisa jɛŋ, á á sunjɛri ámaŋ tɛ.

²² Ábɛɛ mari kiri, á á kulu á shinŋ kiri tɛ miŋ tu ábɛɛ i á kulu-la Ŋuntiŋ ki tɛ ɲaan wɔ̀ tɛ,

²³ sabu shuru ki i awɔ mari ki ŋununtiŋ i, miŋ tu Kirisa i awɔ bilinatɔnŋ kwuru ki bataa ki ŋununtiŋ i ɲaan wɔ̀ tɛ. Bilinatɔnŋ kiri i Kirisa firi ki i, mìntiŋ ki i ji niŋ firi ki Mwutɔnŋ ki i.

²⁴ Niŋ ki ra, bilinatɔnŋ kiri kulu-i Kirisa tɛ ɲaan wɔ̀ tɛ, mari kiri arì kulu arì shinŋ kiri tɛ mìŋ ɲaan ki tɛ finŋ bataa bi ru.

²⁵ Nwɔ̀ i ábɛɛ shuru kiri i, koŋ fɔn awɔ mari bidi a tɛ, miŋ tu Kirisa bilinatɔnŋ kwuru ki bidi-i a tɛ ɲaan wɔ̀ tɛ, fɔ ntiŋ a yɛri wɔri, ntiŋ i beeni ǹʼbira,

²⁶ nwɔma ŋì i fɔɔ wurama ki ra, ju ra niŋ fa Kirinŋ wɔ wulu ki wu, ŋì i kila, ŋì i ǹʼji awɔ.

²⁷ Ŋì niŋ ma-i, nwɔma bilinatɔnŋ kwuru ki nɔɔritiŋ i so tu-i afinŋ ɲaanfɛ, nɔɔmaŋ walima mɔrɔmɔrɔmaŋ walima niŋ bishi fa ja ǹʼna kì, nka ǹʼfɔɔmaan fa ǹʼpɔlibali i ji-i.

²⁸ Mìŋ ɲaan tenŋ ki tɛ, shuru kiri kakan-i kí i arɔɔ mari kiri bidi arì tɛ, miŋ tu arì yɛrima kiri firi kiri. Koŋ woo koŋ i awɔ mari ki bidi-a a tɛ, ntiŋ i a yɛri ki bidi-a a tɛ, niŋ i.

²⁹ Koŋ tɔri tenŋ a firi ki bikwɔ-a a yɛri sun kì, nka ntiŋ i ǹʼnade-a, ntiŋ i a ɲakili tu ǹʼna, miŋ tu Kirisa i ǹʼma-a bilinatɔnŋ kwuru kiri wu ɲaan wɔ̀ tɛ,

³⁰ sabu yibɛɛ bataa tenŋ tenŋ i Kirisa firi ki mani ki bɛɛ ɛ.

³¹ Niŋ ki ra, ǹʼsɛbɛ-i Kirinŋ wɔ wulu sɛbɛ ki ru tu : « Shuru ra na a san a tiŋ fa a ɲiŋ na, tu ntiŋ i ta a da awɔ mari ki ra, tu kí koŋ fuuli ki i ji koŋ tenŋ i. »

³² Ka i gonto sinaŋ i, míŋ i ǹʼbi-a ŋí i ǹʼsan Kirisa fa bilinatɔnŋ kwuru kiri faninmwuŋ ki bi sun.

³³ Nka, ǹʼyɔ bi-a ábɛɛ bi sun sɛbɛ, ábɛɛ shuru kiri bataa tenŋ tenŋ kakan-i, á i áwɔ mari ki bidi á tɛ, miŋ tu á yɛrima kiri, tu mari kiri fani i arì shinŋ kiri gbɛ-ri.