Efɛsitɔnŋ kiri 4 - Jɔ Biibili ki

Bilinatɔnŋ kiri wɔ firi tenbi ki Yesu ra

¹ Mínwɔ̀ i nkasu ru Ŋuntiŋ Yesu tɔ ki bira, míŋ i ábɛɛ rafɛ-a, á tiri á i kɛɲɛ á dɔri ŋuŋ ki wu,

² á i á yɛri sunjɛri bi bataa ra, á i á tɔnsunfili ámaŋ tɛ, á i ji koŋ nduujii ri i, á i ámaŋ wɔ bi kwun ámaŋ nu bidintɛbi wu.

³ Ábɛɛ tenbi wɔ̀ kila-i Ɲiniwɔlinŋ ki bira, á á banba, á i tu ɲaanfɛfili ru niŋ tenbi bi ki ru.

⁴ Firi tenŋ i nmaŋ, Ɲiniwɔlinŋ tenŋ fani i ji nmaŋ, miŋ tu Kirinŋ ábɛɛ dɔri-i gbɛbilimaŋ tenŋ bira ɲaan wɔ̀ tɛ.

⁵ Ŋuntiŋ tenŋ i nmaŋ, bilinabi tenŋ i ji nmaŋ, niŋ fa wurama tenŋ i ji nmaŋ.

⁶ Kirinŋ tenŋ pe fani i nmaŋ sɛbɛ, nwɔ̀ i yi bataa tiŋ i, ŋì i ji yi bataa ŋununu, ŋì i ji yi bataa fan, ŋì i ji yi bataa ciiru.

⁷ Yibɛɛ bataa tenŋ tenŋ kafinŋ kila-i, ŋì i kɛɲɛ Kirisa wɔ shɔɔrinŋ ki kilaka ɲaan ki wu.

⁸ Ǹʼyɔ bi-a Kirinŋ wɔ wulu ki ru tu : « Ǹʼtunparama ki kirinpɔli ki ra, ŋì joŋ ni pa tiri-i a gbɛ, ŋì i buɲafinŋ ni wɔri konaŋ kiri tɛ. »

⁹ A ǹʼbi tu ǹʼtunpa, niŋ kɔri ki dɔɔkunŋ? Niŋ i ǹʼbi-a tu ǹʼjɛri-ri fwuniŋ ki sun sun.

¹⁰ Niŋ ki ra, nwɔ̀ ki jɛri wuru-i, mìŋ tenŋ ki tunpa-i fɔ kirinpɔlila mani narimaŋ kiri ru, nwɔma a i mani kiri bataa faa awɔ sotinbi ki ra.

¹¹ Mìŋ Kirisa tenŋ ki ǹʼbɛɛ ri ji-i awɔ cindaŋ ni i, ŋì i ǹʼbɛɛ ri ji Kirinŋ wɔ cintɔnŋ ni i, ŋì i ǹʼbɛɛ ri ji Wulujii sunjotɔnŋ ni i, ŋì i ǹʼbɛɛ ri ji bilinatɔnŋ kiri maritiiri i, ŋì i ǹʼtɔri ri ji bilinatɔnŋ kiri wɔ kalimɔɔ ri i.

¹² Ŋì niŋ bataa ma-i, nwɔma nini i ye Kirinŋ wɔ konanbi ki tɛ, kí i so ǹʼwɔ baara ki maka shɔ-i, ǹʼbɛɛ i bo Kirisa firi ki gbɛbi ki sun.

¹³ Niŋ ɲaan ki tɛ, yibɔɔ bilinabi ki fa yɔɔ Kirinŋ Danshuru ki tɔmaan ki bira, yibɛɛ bataa ra na ji tenŋ i, yi i kɔɔ, yi i ji koŋ nafaamaan ni i, miŋ tu Kirisa.

¹⁴ Niŋ na, yibɛɛ ra tu tiraŋ ni i kili kì. Koŋ wɔ̀ri i konaŋ kiri sunnɛɛn-na puru kiri fa namarinŋ wulu kiri wu, nini a so yibɛɛ curu san-i saa shɔɔrinŋ ki sun kì, kí i yi i fifa de-ri kɛlinŋ ki fɔn tɛ kì, miŋ tu ju fa faa i buŋ curu-ra ɲaan wɔ̀ tɛ.

¹⁵ Nka, yi sɛli ki bi yimaŋ tɛ bidintɛbi wu, a niŋ ma, yibɛɛ ra so ta-i jɛŋ Yesu Kirisa wɔ tenbi ki ru, ninwɔ̀ i bilinatɔnŋ kwuru kiri ŋununtiŋ ki i.

¹⁶ Niŋ kwuru ki, ninwɔ̀ i bilinatɔnŋ kiri i, niŋ mani kiri bataa kɔlimaan yɛ arìmaŋ na mìŋ Yesu Kirisa ki bira. A niŋ mani kiri bataa arì tukulu ki faa, firi ki bataa ra ta jɛŋ bidintɛbi ki ra.

Bilinatɔnŋ kiri tirikanŋ ŋunaŋ ki bi ki

¹⁷ Ńʼtindaŋ ni, míŋ a nwɔ̀ bi furu ábɛɛ tɛ dɔɔ Ŋuntiŋ ki bira, niŋ i kaa : á fa tiri miŋ tu Kirinŋ tɔbali kiri tiri-ra ɲaan wɔ̀ tɛ kì, nini i tiri-ra, kí i ǹʼkɛɲɛ arɔɔ ɲakilila kwuu kiri wu.

¹⁸ Kí ciiru ɲakili kiri mini-i, Kirinŋ i ɲaninkulutɔnbi ŋunaŋ wɔ̀ wɔri-ra, kí arì po san-i niŋ nu arɔɔ bitɔbalibi ki fa arɔɔ tɔɔnnufurubi ki baraka ra.

¹⁹ Kí ɲaankwun-a kì, niŋ ki ra, kí arì yɛri wɔri-i kakaalibi ki fa bi jɛ kwuru ki bataa tɛ.

²⁰ Yesu Kirisa yibɛɛ kini-i bi wɔ̀ ra, nini niŋ i kì dɛ!

²¹ Sii ǹʼna ǹʼnu kì, ábɛɛ Yesu Kirisa wulu ki rama-i, á i ntiŋ wɔ kalinŋ ki tɔ, á fani i ji ǹʼtɔ tu sɛli i.

²² Niŋ ki ciiru, ábɛɛ wuru tiri-ra ɲaan wɔ̀ tɛ fɔlɔfɔlɔ, á niŋ tirika ɲaan ki tɔnbo pewu, á fa á ɲaninpo niŋ bi bwuu kiri tɛ kili kì, ninki i konaŋ kiri fɔni-na, ŋì i kí haliki-ri.

²³ Niŋ ki ra, á á ciiru ɲakili kiri rapwulu, yìrì i ji ǹʼŋunaŋ ni i.

²⁴ Á sɔŋ ŋunaŋ de á ru, ninwɔ̀ i Kirinŋ dintɛ wɔ ki i. Niŋ sɔŋ ŋunaŋ ki i tɔ-a yibɔɔ ɲaninkulutɔnbi ki ru, telibi fa wɔlɔnbi wu, sɛli ki i nini wɔ̀ wɔri-ra.

²⁵ Niŋ ki ra, á fa puru bi á tɔnŋ ki ra kili kì, á sɛli ki bi ámaŋ tɛ, sabu yibɛɛ bataa ji-i finŋ tenŋ i. Yibɛɛ bataa tenŋ tenŋ i miŋ tu firi tenŋ na mani ki bɛɛ ɛ.

²⁶ A ábɛɛ tɔnkwulu, niŋ tɔnkwulu ki fa á po bijɛ ma sun kì. Sunŋ ki fa fyiri á tɔnsunfilibali kì.

²⁷ Á fa saa wɔri shitaanni tɛ kì.

²⁸ A koŋ wɔ̀ri ji wuru kwunŋ tan-a, tu nini fa kwunŋ tan kili kì, nka tu kí baara shɔɔrinŋ ma arì gbɛ kiri wu, nwɔma kí i ye finŋ bali kiri tɛ.

²⁹ Wulu kulinŋ fa po ábɛɛ tɔnŋ na kì, nka á wulu shɔɔrinŋ bi, nwɔ̀ a ye koŋ tɔri ki tɛ, ntiŋ i ta jɛŋ Kirinŋ wɔ saa ki fan. Á wulu fumaan ni bi-ri, nwɔ̀ri a shɔɔrinŋ ma arì ramatɔnŋ kiri tɛ.

³⁰ Á fa Ɲiniwɔlinŋ ki tɔnfɔɔ kì. Niŋ Ɲiniwɔlinŋ ki i taanshɛ ɛ, Kirinŋ ninwɔ̀ bo-i ábɛɛ sun, nwɔma ŋì i ǹʼji tu ábɛɛ afɔɔn ni. Ǹʼyɔ ǹʼji-a sɛbɛ tu jibi bɛɛ yirira nmaŋ, tu afinŋ na ábɛɛ ŋunsan pewu pewu.

³¹ Niŋ ki ra, á saabi ki po san á ciiru, á fa tɛɛ tu á ciiru koŋ cɛfan kì, á fa á tɔnkwulu kì, á fa koŋ fa kari kì, á fa koŋ ki kì. Á siri fa juubi ma kili kì!

³² Á ámaŋ sunmakwulupa, á i shɔɔrinŋ ma koŋ bataa tɛ. Á i ámaŋ wɔ pɔli tu ámaŋ tɛ, miŋ tu Kirinŋ ábɔɔ pɔli kiri tu-i a tɛ Kirisa wɔ bi mamaan ki bira ɲaan wɔ̀ tɛ.