Efɛsitɔnŋ kiri 3 - Jɔ Biibili ki

Cinŋ wɔ̀ biye Pooli gbɛsun shiya tɔri kiri kanfɛ

¹ Niŋ ki ra, míŋ Pooli i Kirinŋ nafɛ-a ábɛɛ tɛ waarinŋ bataa ru. Míŋ i nkasu ru Yesu Kirisa tɔ ki bira, sabu míŋ i Wulujii ki sunjo-a ábɛɛ shiya tɔri kiri tɛ.

² Ábɛɛ ǹʼnama tu Kirinŋ ka cinŋ ka wɔri míŋ tɛ, tu ŋí i ǹʼma ábɛɛ tɛ, ŋì shɔɔrinŋ ma-i míŋ tɛ, a niŋ ji-i kì, míŋ wuru-ra so ǹʼkila-i kì.

³ Kirinŋ yɛrima ki awɔ gonto ki ji-i míŋ wu, nwɔma ŋí i ǹʼtɔ miŋ tu míŋ pyaanŋ sɛbɛ-i ǹʼsun ɲaan wɔ̀ tɛ.

⁴ A ábɛɛ mɔ́ɔ́n sɛbɛ ki kali waarinŋ wɔ̀ ru, míŋ Kirisa wɔ gonto ki tɔ-i ɲaan wɔ̀ tɛ, ábɛɛ ra niŋ tɔ.

⁵ Kirinŋ niŋ gonto ki ji konanmini sɛri tɔri tenŋ wu waarinŋ fwuudemaan ki tɔri tenŋ nu kì. Nka dɔnsaŋ, ŋì ǹʼji-i Yesu wɔ cindaŋ kiri fa Kirinŋ wɔ cintɔnŋ wɔlinŋ kiri wu Ɲiniwɔlinŋ ki bira.

⁶ Niŋ gonto ki i tu Kirinŋ bi shɔɔrinŋ finŋ woo finŋ tɔnŋ wɔri awɔ konanbi ki tɛ, tu ábɛɛ shiya tɔri kiri lu kila niŋ na, á i dɛbɛ ji firi tenŋ i. Kirinŋ a tɔnŋ wɔri-i bi wɔ̀ ra Yesu Kirisa bira, ábɛɛ niŋ kila-i Wulujii ki sunjomaan ki bira.

⁷ Kirinŋ shɔɔrinŋ ma-i míŋ tɛ, ŋì i míŋ shi awɔ baara ki ra, tu míŋ Wulujii ki sunjo konaŋ ki tɛ. Ŋì niŋ ma-i a yɛri ki wɔ sotinbi ki wu.

⁸ Mínwɔ̀ i Kirinŋ wɔ wɔlinŋ kiri bataa ru pyaanŋ ki i, Kirinŋ niŋ kafinŋ ki wɔri-i míŋ tɛ, tu míŋ Wulujii ki sunjo shiya tɔri ru konaŋ kiri tɛ, niŋ Wulujii ki i Yesu Kirisa wɔ shɔɔrinŋ kɔbali ki i.

⁹ Ǹʼtu míŋ niŋ gonto ki po manisarinŋ tɛ, nwɔma konaŋ kiri i ǹʼtɔ. Kirinŋ wɔ̀ ki finŋ kiri bataa ramɔni-i, ka gonto ka radumaan wuru mìnki gbɛ nmaŋ kabi fɔlɔfɔlɔ.

¹⁰ Ŋì ncin-i niŋ gonto ki i tɔ dɔɔ, nwɔma bilinatɔnŋ kwuru kiri bira, kirinpɔlila masabi kiri fa sotinbi kiri bataa i ǹʼtɔ, tu ɲakilitinbi Kirinŋ gbɛ finŋ bataa ru.

¹¹ Kirinŋ niŋ ma-i, ŋì i ǹʼkɛɲɛ awɔ bi gbɛbilimaan kiri wu, kabi fɔlɔfɔlɔ juniɲa tɔnpa waaci ki jɛŋ, ŋì i ǹʼma yibɛɛ Ŋuntiŋ Yesu Kirisa bira.

¹² Yibɛɛ ɲakili sɔɔmaan ni i so-a yi kpari-i Kirinŋ tɛ ŋununfurubi wu, sabu yibɛɛ bili-i Ŋuntiŋ Yesu Kirisa ra.

¹³ Niŋ ki ra, ńʼtindaŋ ni, cɔɔri wɔ̀ i míŋ kila-a ábɛɛ bira, niŋ fa á firi kilɛn kì, ninki i ábɛɛ ŋununfɛshi ŋuŋ ki i.

Kirinŋ wɔ bidintɛbi ki tɔ bi ki

¹⁴ Niŋ ki ra, míŋ i ńʼkwushiri-ra, ŋí i Tiŋ Kirinŋ nafɛ,

¹⁵ mìnwɔ̀ ki i finŋ kiri bataa tiŋ ki i, pwɔkulinŋ ki sun, niŋ fa kirinpɔli ki ra,

¹⁶ ńʼtu ǹʼwɔ Ɲiniwɔlinŋ ki faan fa tɔnnafurubi wɔri ábɛɛ tɛ, ŋì i kɛɲɛ a yɛri ki wɔ nɔɔri sinaŋ ki wu,

¹⁷ niŋ fa tu Yesu i so sɔɔ ábɛɛ ciiru tɔnŋ kiri ra bilinabi ki bira, nwɔma á banbamaan i tu bidintɛbi ki ra ɲaan bataa tɛ.

¹⁸ A niŋ ma, ábɛɛ fa Kirinŋ wɔ wɔlinŋ kiri bataa ra na Kirisa wɔ bidintɛbi ki ciiru cuubi ki fa ǹʼgbɛbi ki fa ǹʼŋmaka ki tɔ.

¹⁹ Daŋ Kirisa wɔ bidintɛbi wɔ̀ ra kì, ábɛɛ ra so niŋ tɔ-i, á i á ciiru ki bataa faa Kirinŋ wɔ bidintɛbi ki ra, fɔ á i pyii.

²⁰ Yibɛɛ i finŋ woo finŋ nafɛ-a, walima yi ɲakili i ji finŋ woo finŋ bi sun, Kirinŋ i so-a niŋ bi kiri bataa ma-i yibɛɛ tɛ, fɔ ŋì i ǹʼfwuu niŋ bataa sun awɔ sotinbi ki baraka ra, niŋ sotinbi ki wɔ̀ i baara ki ma-a yibɛɛ ciiru.

²¹ Coolinŋ wɔri Kirinŋ tɛ awɔ bilinatɔnŋ kwuru kiri faninmwuŋ, Yesu Kirisa wɔ tenbi ki bira waarinŋ bataa ru, sɛri kiri bataa gbɛ. Amiina!