Tesalonikitɔnŋ kiri (2) 2 - Jɔ Biibili ki

Ŋuntiŋ ki pwulu na bi ki

¹ Ńʼtindaŋ ni, nwɔ̀ i Ŋuntiŋ Yesu Kirisa pwulu na bi ki fa yi bataa rakɔli bi ki i ntiŋ ɲaanfɛ,

² á fa ncusun koŋ i na á ciiru ɲakili ɲaanmi maannaanŋ tenŋ nu, ntiŋ i á gbɛɛratɛɛ tu afinŋ cintɔnbi wulu kila, walima tu Kirinŋ wɔ wulu ki ǹʼbi, walima ntiŋ i sɛbɛ tanmaan wulu bi, tu nwɔ̀ po yibɛɛ gbɛ, nwɔ̀ i ǹʼbi-a tu Ŋuntiŋ ki wɔ jibi ki so kɔ kì.

³ Á fa ncusun koŋ i á sunnɛɛn ɲaan tɔri tenŋ tɛ kì. Sabu Ŋuntiŋ ki a so na sun, konaŋ kiri ra arì kaan Kirinŋ tɛ sun, niŋ kɔɔtɛ, nwɔ̀ i dɔri-ra tu « Koŋ jɛ ki », ninwɔ̀ bo-i halikirama ki tɛ, niŋ i a yɛri ji.

⁴ Konaŋ kiri i finŋ woo finŋ ji-a arɔɔ kirinŋ kiri i, kí i finŋ woo finŋ gbɛ-ri, niŋ ɲa ki i a yɛri bo-a nini bataa ŋununtiŋ i, fɔ ŋì i a tɔɔn, ŋì i ta sɔɔ Kirinfusinaŋ ki ru, ŋì i ǹʼbi tu afinŋ Kirinŋ i.

⁵ Waarinŋ wɔ̀ ru míŋ wuru ábɛɛ fan, míŋ wuru mìŋ ka wulu bi-a ábɛɛ tɛ kì wa? Ábɛɛ ɲakililafɔni-i ǹʼtɛ wa?

⁶ Nwɔ̀ i ǹʼsuu-ra a yɛri ji ki sun dɔnsaŋ, ŋì i awɔ waaci ki sunsuu-ri, ábɛɛ niŋ tɔ-i.

⁷ Sabu niŋ li tantɔnŋ juumaan nadumaan ki awɔ baara kiri tɔnpa-i kɔ, ǹʼtu-i dɔnsaŋ, nwɔ̀ i ǹʼnasuu-ra, niŋ i a san ǹʼjɛŋ.

⁸ A niŋ a san nmaŋ, Koŋ jɛ ki ra a yɛri ji. Nka yibɛɛ Ŋuntiŋ Yesu a na ǹʼhaliki a tɔnŋ na faa wu, ntiŋ i ǹʼbi ki bataa kɔ a na ki sarinŋ ki wu.

⁹ Niŋ koŋ jɛ ki a na a yɛri ji shitaanni wɔ sotinbi ki baraka ra. Ŋì i kabakobi kwuru ki bataa fa botɔnsunbi ri fa taanmashɛ ri ma, nwɔ̀ri i koŋ fɔni-na.

¹⁰ Ŋì i a na bi kulinŋ kwuru ki bataa ma, nwɔma nwɔ̀ri wuru fɔni saa ki sun, a i nini fɔni. Niŋ konaŋ kiri ra na haliki, sabu sɛli wɔ̀ wuru-ra kí mwu, kí ji niŋ tɛ kì, kí ǹʼbidi arì tɛ kì.

¹¹ Ninki a ncin Kirinŋ niŋ koŋ fɔni sotinbi ki bo na kí sun, nwɔma kí i bili puru ki ra.

¹² Ǹʼma-i ninkunŋ, nwɔma koŋ wɔ̀ri bili sɛli ki ra kì, telibalibi ki i di kí tɛ, Kirinŋ wɔ kiti ki i fɛɛn nini bataa sun.

Kirinŋ wɔ koŋ ɲaannashimaan kiri bi ki

¹³ Míŋ tindaŋ ni, yibɛɛ kɔniŋ kakan-i yi i coolinŋ wɔri-ri Kirinŋ tɛ waarinŋ bataa ru ábɛɛ bira, Ŋuntiŋ ki ábɛɛ wɔ̀ri bidi-i a tɛ, sabu Kirinŋ ábɛɛ ɲaannashi-i kabi fɔlɔfɔlɔ, nwɔma a i á mwu Ɲiniwɔlinŋ ki wɔ sotinbi ki baraka ra, ninwɔ̀ ábɛɛ wu fɔɔ-ɔ áwɔ bilinabi ki bira sɛli ki ra.

¹⁴ Yibɛɛ Wulujii wɔ̀ sunjo-i ábɛɛ tɛ, Kirinŋ ábɛɛ dɔri-i, nwɔma a i á mwu ninki baraka ra. Ŋì i ábɛɛ dɔri-i, nwɔma ábɛɛ yibɛɛ Ŋuntiŋ Yesu Kirisa nɔɔri ki kila.

¹⁵ Niŋ ki ra, ńʼtindaŋ ni, á á banba tu bilinabi ki ru, yibɛɛ kalinŋ wɔ̀ wɔri-i ábɛɛ tɛ, yi tɔnŋ na walima sɛbɛ ru, á i á da tu nini na.

¹⁶ Yibɛɛ Ŋuntiŋ Yesu Kirisa, fa yi Tiŋ Kirinŋ wɔ̀ ki yibɛɛ bidi-i a tɛ, ŋì i siratubi fa gbɛbilimaŋ kɔbali wɔri yibɛɛ tɛ awɔ shɔɔrinŋ ki baraka ra,

¹⁷ tu nini cunadibi wɔri á tɛ, á i baraka kila, á i bi shɔɔrinŋ ma-ni waarinŋ bataa ru, á mabi kiri fa á bi wulu kiri ra.