Korɛntitɔnŋ kiri (2) 3 - Jɔ Biibili ki

Tɔnwɔri ŋunaŋ ki ru baara matɔnŋ kiri bi ki

¹ Dɔnsaŋ, míŋ wulu wɔ̀ri bi-i ábɛɛ tɛ ńʼwɔ sɛbɛ ka ru, á fa npwulu-li tu míŋ i ǹʼtɛ ŋí i yibɛɛ tɔ shɔɔrinŋ bi ábɛɛ tɛ kì dɛ! Miŋ tu ǹʼbɛɛ ri i ǹʼma-a ɲaan wɔ̀ tɛ, a yibɛɛ ji ta-a ábɛɛ tɛ, yibɛɛ maku i ǹʼna yi i ta sɛbɛ tanmaan wu ábɛɛ tɛ, nwɔ̀ i yibɛɛ tɔ shɔɔrinŋ bi-a wa? Aayi! Yibɛɛ maku fani ǹʼna tu ábɛɛ sɛbɛ tan wɔri yibɛɛ tɛ nwɔ̀ a ta ǹʼji koŋ tɔri kiri wu tu yibɛɛ cindaŋ sɛlɛsɛli li kì.

² Ábɛɛ yɛrima kiri i yibɛɛ tɔ shɔɔrinŋ ki sunjo sɛbɛ ki i, ninwɔ̀ sɛbɛ-i yibɛɛ ciiru tɔnŋ kiri ra, koŋ bataa ra so nwɔ̀ tɔ-i, kí i ǹʼkali.

³ Sɛli ki ra, ábɛɛ i miŋ tu Kirisa yɛrima ki wɔ sɛbɛ tanmaan ni, ŋì i wɔri na yibɛɛ gbɛɛra. Niŋ sɛbɛ ki tan dabaju ra kì, nka ǹʼtan-i Kirinŋ ɲaninkulutɔnŋ ki ɲini ki wu. Ǹʼsɛbɛmaan a faa buaŋ ni sun kì, nka ǹʼsɛbɛ-i konanmini ciiru tɔnŋ ki sun.

⁴ Niŋ bilinabi ki i yibɛɛ gbɛ Kirinŋ ɲaanfɛ Kirisa baraka ra.

⁵ Ŋì i miŋ tu sotinbi yibɛɛ gbɛ yi i bi bɛɛ ma yi yɛrɛtɛ kì, nka yibɔɔ baraka ki i po-a Kirinŋ gbɛ.

⁶ Sabu mìnki baraka wɔri-i yibɛɛ tɛ, yi i ji tɔnwɔri ŋunaŋ ki ru baara matiiri i, niŋ tɔnwɔri ki cɛ sɔɔ sariya sɛbɛmaan sun kì, nka ǹʼcɛ ki sɔɔ Ɲiniwɔlinŋ ki sun, sabu sariya sɛbɛmaan ki i na-a beŋ wu, nka Ɲiniwɔlinŋ ki i ɲaninkulutɔnbi ki wɔri-ra koŋ tɛ.

⁷ Sɛli yɛ, sariya wɔ̀ i beŋ ki so-a koŋ sun, Kirinŋ niŋ sɛbɛ wuru faa buaŋ ni sun. Niŋ fa a fɔn na, nɔɔri wuru ǹʼnu, fɔ Isirayɛlidaŋ kiri wuru so-a Kirinŋ wɔ cintɔnŋ Musa shɛɛli-i a ɲaannu kì, nka niŋ nɔɔri ki wuru cin wɔ kì.

⁸ Niŋ na, a sariya ki nɔɔri ki ji niŋ ma, Ɲiniwɔlinŋ ki wɔ baara ki nɔɔri ki a gbɛ niŋ wu kì wa?

⁹ Sii ǹʼna ǹʼnu kì, saa wɔ̀ i Kirinŋ wɔ kiti ki fɛɛn-na koŋ sun, a nɔɔri ji wuru niŋ na, saa wɔ̀ i koŋ ji-a koŋ telimaan a Kirinŋ ɲaanfɛ, niŋ nɔɔri ki a fwuu niŋ sun haali.

¹⁰ Yi a so ǹʼbi-i tu nɔɔri wɔ̀ wuru cu-a fɔlɔfɔlɔ, tu niŋ nɔɔri ki ji finŋ sinaŋ i kili kì, sabu nɔɔri tɔri na-i, nwɔ̀ gbɛ-i ǹʼwu pewu.

¹¹ Finŋ wɔ̀ a fwuude, a niŋ ji nɔɔri kila, finŋ kɔbali ki nɔɔri ki a fwuu niŋ wɔ ki sun pewu!

¹² Yibɛɛ gbɛbilimaŋ ki i niŋ bi kiri, niŋ ki ra, yibɛɛ ɲakili sɔɔmaan yɛ waarinŋ bataa ru.

¹³ Musa wuru juulinŋ la-a a ɲaannu, nwɔma Isirayɛlidaŋ kiri fa a ɲaannu ki nɔɔri ki kɔɔra ki ja kì. Nka yibɛɛ ǹʼma-a niŋ sali kì.

¹⁴ Isirayɛlidaŋ kiri ciiru ɲakili kiri furu-i. Hali jiŋ, a kí ji Tɔnwɔri Bwuumaan ki sɛbɛ kiri kali-la, ǹʼyɔ ji-a miŋ tu kí juulinŋ la kí ɲaanna, kí yìrì ɲaantɔ-a kì. Kí so niŋ juulinŋ ki san-i arì ɲaannu sun kì, sabu niŋ juulinŋ ki i so-a san-i koŋ ɲaannu Kirisa bantenŋ na.

¹⁵ A Isirayɛlidaŋ kiri ji Musa wɔ sɛbɛ kiri kali-la hali dɔɔ, ǹʼyɔ miŋ tu juulinŋ lamaan kí ciiru ɲakili kiri sun, kí yìrì ɲaantɔ-a kì.

¹⁶ Nka koŋ woo koŋ a ɲaannupwulu Ŋuntiŋ ki tɛ, ntiŋ i ji ǹʼtɛ, nintiŋ ɲaanna la juulinŋ ki i san-a.

¹⁷ Á ǹʼtɔ tu yibɛɛ i Ŋuntiŋ wɔ̀ wulubi-a kwumaŋ, tu Ɲiniwɔlinŋ ki i. Ŋuntiŋ ki ɲini ki i mani wɔ̀ ru, konaŋ kiri i arì yɛri wɔ ri niŋ mani nu.

¹⁸ Ka juulinŋ ka la yi finŋ woo finŋ ɲaanna kili kì, yi i Ŋuntiŋ nɔɔri ki sarinŋ ki ja-a miŋ tu yɛrɛfɛri ru, niŋ ki ra, yi i rapwulu ji-a Ŋuntiŋ ki sali, yi nɔɔri ki i gbɛ ta-ri jibi woo jibi. Ŋuntiŋ ki ɲini ki i baara ma-a.