Tesalonikitɔnŋ kiri (1) 5 - Jɔ Biibili ki

Ŋuntiŋ ki na shikaŋ ki jɛŋ namɔnika ki

¹ Ńʼtindaŋ ni, ka bi kari a na ma waaci wɔ̀ ru, ábɛɛ maku ǹʼna yibɛɛ sɛbɛ wɔri ta ábɛɛ tɛ niŋ bi sun kì.

² Sabu, ábɛɛ yɛrima kiri i ǹʼtɔ-a tu Ŋuntiŋ ki na jibi ki a na bali konaŋ kiri ra, miŋ tu kwunŋ i bali-la koŋ na ɲaan wɔ̀ tɛ cii ru.

³ Waarinŋ wɔ̀ ru konaŋ kiri a na ǹʼbi-ri tu : « Yibɛɛ ɲaanfɛfili-i, yi i ji fɛri », mìŋ waaci tenŋ ki ru, cɔɔri ki a na kí kila, miŋ tu mari wɔ danji ciiyaa i bali bo-a nmari sun ɲaan wɔ̀ tɛ. Koŋ tɔri tenŋ a na a mwu kì.

⁴ Nka, nwɔ̀ i ábɛɛ, niŋ mancinŋ nu finŋ i ábɛɛ gbɛ kì. Míŋ tindaŋ ni, Ŋuntiŋ ki na shikaŋ ki a na bali ábɛɛ ra, miŋ tu kwunŋ kili kì.

⁵ Sabu ábɛɛ bataa i manisarinŋ daŋ ni i, niŋ fa suntɔnŋ daŋ ni i, yibɛɛ cii fa mancinŋ daŋ ni i kì.

⁶ Niŋ ki ra, yi fa ɲinintan-ni miŋ tu koŋ pyɛ kiri kì. Yi tu yi ɲaanna, yi i yi ɲakili tu yi yɛri ra, yi ɲakili ki sɔɔmaan i ji-i waarinŋ bataa ru.

⁷ Cii ki i ɲinintantɔnŋ kiri ɲinintan waari ki i, niŋ fa lɔ mwunutɔnŋ kiri kari waari ki i lɔ ki gbɛ

⁸ Nka yibɛɛ wɔ̀ri i suntɔnŋ sarinŋ ki nu, yi i yi ɲakili ki sɔɔ tenŋ sun. Bilinabi ki fa bidintɛbi ki ja yi ra, miŋ tu peejɛrɛbi. Yibɛɛ yi gbɛ bili-i mwubi wɔ̀ sun, niŋ i ji yɔɔ peebunfila ki i.

⁹ Kirinŋ dintɛ bi i tu awɔ tɔnkwulu ki so yibɛɛ sun kì, duu awɔ mwubi ki yibɛɛ Ŋuntiŋ Yesu Kirisa bira.

¹⁰ Ŋuntiŋ ki beeni-i yibɛɛ bira, nwɔma tu yibɛɛ ɲaninkulutɔnŋ kiri, walima yi beenimaan kiri i de a fan ɲaninkulutɔnbi ki ru, yi tu yimaŋ fan waarinŋ bataa ru.

¹¹ Niŋ ki ra, á ámaŋ cunadi, á i ǹʼbɛɛ bo ámaŋ baraka ki sun, miŋ tu ábɛɛ juu ǹʼma-a ámaŋ tɛ ɲaan wɔ̀ tɛ kɔ.

Pooli wɔ racinwulu lakɔɔra kiri

¹² Ńʼtindaŋ ni, míŋ ǹʼceeli-la ábɛɛ gbɛ, ńʼtu nwɔ̀ri i arì yɛri yɛli-la, kí i ábɛɛ bo-ri Ŋuntiŋ ki wɔ saa ki tirika ɲaan shɔɔrinŋ ki fan, niŋ fa kí i á racin-ni, ńʼtu á baraka de nini nu.

¹³ Á kí bidi á tɛ, á i baraka de kí ru kusɛbɛ arɔɔ cinŋ ki bira. Á i ncusun ɲaanfɛfili i ji á faninmwuŋ.

¹⁴ Yi tindaŋ ni, yibɛɛ i ǹʼceeli-la ábɛɛ gbɛ, tu koŋ wɔ̀ri tirika shɔ-a ŋì i kɛɲɛ Kirinŋ wɔ saa ki wu kì, tu á nini nacin, á i kí bo saa shɔɔrinŋ sun. Daŋ kɔ-i nwɔ̀ri sun, á i nini siratu, á i ye baraka bali kiri tɛ, á i á tɔnsunfili koŋ bataa tɛ.

¹⁵ Á á yɛri paka shɔ, koŋ tɔri tenŋ fa bijɛ kɔni sali bijɛ wu kì. Á ji shɔɔrinŋ matɔnŋ ni waarinŋ bataa ru, ámaŋ tɛ niŋ fa koŋ bataa tɛ.

¹⁶ Á á ciirudi waarinŋ bataa ru.

¹⁷ Á fa Kirinŋ nafɛ ki tɔnbo kì.

¹⁸ Á baraka bi-ri Kirinŋ tɛ bi bataa ra, sabu ninki i Kirinŋ dintɛ bi ki i ábɛɛ gbɛ, ábɛɛ wɔ̀ri bili-i Yesu Kirisa ra.

¹⁹ Á fa Ɲiniwɔlinŋ ki natu kì.

²⁰ Á fa cintɔnbi wulu kiri rufyɛ kì,

²¹ nka á wulu bimaan ki bataa rufɔɔ, nwɔ̀ shɔ-i, á i niŋ pa á sɔbɛ ra.

²² Á á yɛri paka tɔ bijɛ kwuru ki bataa kankantɛ.

Pooli wɔ coolinŋ nakɔɔra kiri

²³ Dɔnsaŋ, ɲaanfɛfili ki i po-a Kirinŋ wɔ̀ gbɛ, tu niŋ yɛrima ki tu á fan áwɔ ɲaninkulutɔnbi ki bataa ru, ŋì i á mani ki bataa wu fɔɔ, á i ji ǹʼwɔ ri. Á ɲakili ki fa ɲini ki bataa fa á firi ki bataa pɔlibali i tu, fɔ ŋì i ta so yibɛɛ Ŋuntiŋ Yesu Kirisa pwulu na shikaŋ ki sun.

²⁴ Kirinŋ wɔ̀ ki ábɛɛ dɔri-i, niŋ i dariwulutiŋ i, ninki a niŋ bi kiri bataa po arì saa tɛ sɛbɛ.

²⁵ Ńʼtindaŋ ni, á Kirinŋ nafɛ-ri yibɛɛ yɛrima kiri tɛ.

²⁶ Á tindaŋ kiri bataa co wɔlɔnbi coolinŋ wu.

²⁷ Ŋuntiŋ ki tɔ ki bira, míŋ i ǹʼceeli-la ábɛɛ gbɛ, ńʼtu á ka sɛbɛ ka kali tindaŋ ki bataa tɛ.

²⁸ Yibɛɛ Ŋuntiŋ Yesu Kirisa shɔɔrinŋ ma á bataa tɛ.