Tesalonikitɔnŋ kiri (1) 3 - Jɔ Biibili ki

Pooli Timote cin-i Tesaloniki

¹ Yibɛɛ na-i ǹʼja tu yibɛɛ ra so sunsuu tan-i kili kì, niŋ ki ra, yibɛɛ i tu yi cinŋ Atɛni,

² yi i Timote bo tiri ábɛɛ tɛ. Kirinŋ wɔ baara ki ru, ninwɔ̀ i Kirisa Wulujii ki sunjorama ki i, yibɛɛ tindaŋ fa yi baara mashi yɛ. Yibɛɛ i ntiŋ cin ta-a ye ábɛɛ tɛ. Ntiŋ a ta ye ábɛɛ tɛ, á i tɔnnafurubi kila áwɔ bilinabi ki ru,

³ nwɔma ka waaci ka ru cɔɔri ki fa na ji ábɛɛ firi kilɛn ŋuŋ i kì. Á ǹʼtɔ tu niŋ cɔɔri kiri kakan yìrì i yibɛɛ bilinatɔnŋ kiri kila.

⁴ Ŋì i yibɛɛ tu ábɛɛ fan, yibɛɛ ǹʼjɛnbi wuru ábɛɛ tɛ, tu cɔɔri a yibɛɛ kila, ninki ma-i kaa.

⁵ Míŋ waa-a ábɛɛ fyii ki pa-i ńʼna, niŋ ki ra, ŋí i Timote cin, tu niŋ i ta á shɛɛli, nwɔma ŋí i so ábɔɔ bilinabi ki ɲaantɔ-i. Míŋ wuru kɛni-na, ńʼtu shitaanni fa ji ábɛɛ sunnɛɛn-ɛ, ŋì i á fɔni, yibɔɔ yɛlinŋ ki i ji ǹʼtawɔ ɔ kì.

Tesalonikitɔnŋ kiri bi ki Pooli tɔnfili-i.

⁶ Nka dɔnsaŋ, Timote yiri-i ábɛɛ tɛ, ntiŋ i so yibɛɛ tɛ kwumaŋ. Ntiŋ na-i ábɔɔ bilinabi ki niŋ fa áwɔ bidintɛbi ki ru wulu shɔɔrinŋ bi yibɛɛ tɛ. Ntiŋ tu ábɛɛ ɲakili yibɛɛ ra kusɛbɛ, niŋ fa tu yibɛɛ fyii ábɛɛ ru, miŋ tu ábɛɛ fyii ki i yibɛɛ ru ɲaan wɔ̀ tɛ.

⁷ Ńʼtindaŋ ni, niŋ wulu kiri bi-i yibɛɛ tɛ waarinŋ wɔ̀ ru, yibɛɛ tɔnfili-i ábɛɛ bira áwɔ bilinabi ki baraka ra, ŋì i yi tu yɔɔ makwulubi kiri fa yɔɔ ɲaanfɛkwulu bi kiri ru.

⁸ Dɔnsaŋ, yibɛɛ ra so si-i, sabu yibɛɛ ǹʼtɔ-i tu ábɔɔ bilinabi ki a ɲaan ki tɛ Ŋuntiŋ ki ra.

⁹ Yibɛɛ ciirudibi wɔ̀ kila-i ábɛɛ bira, yibɛɛ ǹʼtɔ tu yi a niŋ coolinŋ ki wɔri Kirinŋ tɛ ɲaan wɔ̀ tɛ kì.

¹⁰ Yibɛɛ i Kirinŋ nafɛ-a cii fa sunŋ, yi i yi makwuluye-ri ǹʼtɛ, tu ŋì ncusun yi i yi pwulu tiri ábɛɛ tɛ, nwɔma yi i ta yi ɲaniŋ bili ábɛɛ sun sɛbɛ. A niŋ ma, nwɔ̀ cin-i ábɔɔ bilinabi ki ra, yi i ta á kini niŋ na.

¹¹ Yibɛɛ Tiŋ ki, ninwɔ̀ i Kirinŋ yɛrima ki i, niŋ fa yi Ŋuntiŋ Yesu saa ki rawwulu, nwɔma yibɛɛ i so ta-i po ábɛɛ tɛ.

¹² Bidintɛbi wɔ̀ i ábɛɛ faninmwuŋ niŋ fa koŋ tɔri kiri kɛlintɛ, Ŋuntiŋ ki mwɔɔnna bo niŋ sun á gbɛ, miŋ tu yibɛɛ ábɛɛ bidi-i yi tɛ ɲaan tɛ.

¹³ Ŋì baraka de á ru, á i ji koŋ shɔɔrinŋ pɔlibali li i, yibɛɛ Tiŋ Kirinŋ ɲaanfɛ, yi Ŋuntiŋ Yesu Kirisa pwulu na waaci ki ru, awɔ konanbi wɔlinŋ ki bataa wu. Amiina!