Tesalonikitɔnŋ kiri (1) 2 - Jɔ Biibili ki

Pooli baara wɔ̀ ma-i Tesaloniki kili ki ru

¹ Ńʼtindaŋ ni, ábɛɛ yɛrima kiri ǹʼtɔ-i tu yibɛɛ tamaan ki ji ǹʼgbansanŋ i ábɛɛ tɛ kì.

² Ábɛɛ ǹʼtɔ-i tu kí yibɛɛ ki, niŋ fa kí i yi paka jɛ tan Filipi kili ki ru, nka niŋ fa a fɔn na, yibɛɛ yi gbɛ bili-i yɔɔ Kirinŋ ki sun, yi i ta Wulujii ki bi ábɛɛ tɛ kari mwɔɔnna faninmwuŋ.

³ Yibɛɛ yɔɔ Kirinŋ wɔ wulu ki bi, nwɔma yi konaŋ ni fɔni kì, yi dumiŋ ǹʼbi ɲakilila jɛ walima wulu fuuli wu kì.

⁴ Yibɛɛ i Kirinŋ wɔ Wulujii ki bi-a, ŋì i kɛɲɛ Kirinŋ dintɛ bi ki wu, sabu Kirinŋ yibɛɛ sunsunu-i, ŋì i bili yi ra, ŋì i awɔ Wulujii ki biye yi gbɛsun. Niŋ ɲaan ki tɛ, yibɛɛ i ǹʼbi-a, nwɔma yi bi i di konaŋ ni tɛ kì, nka yibɛɛ i ǹʼbi-a, yi i yi yɛri bidi Kirinŋ tɛ, ninwɔ̀ ki i konaŋ ciiru ki rufɔɔ-ra.

⁵ Ábɛɛ yɛrima kiri ǹʼtɔ-i, tu yibɛɛ koŋ tɔri tenŋ ɲaanna wulu bi kì. Yi dumiŋ finŋ ceeli kì. Kirinŋ i yibɛɛ shɛɛri ki i.

⁶ Yibɛɛ ǹʼceeli koŋ i yi gbɛ kì, yi ǹʼceeli ábɛɛ gbɛ kì, yi fani dumiŋ ǹʼceeli koŋ tɔri gbɛ kì.

⁷ Yibɛɛ wuru-ra so faan bo-i ábɛɛ sun, sabu tu yibɛɛ Kirisa wɔ cindaŋ ni, nka yibɛɛ niŋ ma kì. Yibɛɛ ábɛɛ pa-i sunjɛribi wu, miŋ tu daŋ ɲiŋ a ɲakili tu-a a daŋ ni na ɲaan wɔ̀ tɛ.

⁸ Ábɛɛ bidi wuru yibɛɛ tɛ kusɛbɛ, niŋ ki ra, yibɛɛ i yi tu yi i Kirinŋ wɔ Wulujii ki bi ábɛɛ tɛ, niŋ fa yi ji wuru-ra yi tu yi i yi ɲini ki wɔri ábɛɛ bira, sabu ábɛɛ bi ki gbɛ wuru yibɛɛ gbɛ kusɛbɛ.

⁹ Ńʼtindaŋ ni, yibɛɛ cinŋ ki ma-i sunfurubi wu ábɛɛ kanfɛ ɲaan wɔ̀ tɛ, ábɛɛ ɲakililafɔni-i niŋ tɛ wa? Yibɛɛ baara ki ma-i cii fa sunŋ, nwɔma yi fa ji koŋ tɔri tenŋ wɔ shii i, yɔɔ Kirinŋ wɔ Wulujii ki sunjomaŋ ki ru ábɛɛ tɛ kì.

¹⁰ Ábɛɛ i yibɛɛ shɛɛri kiri i, Kirinŋ yɛrima ki i ji yi shɛɛri i, tu ŋì i yibɛɛ tu ábɛɛ bilinatɔnŋ kiri kanfɛ, tu yibɛɛ tiri fɔɔbi wu. Yibɛɛ telimaan wuru-i, pɔlimaŋ wuru yi ra kì.

¹¹ Yibɛɛ ábɛɛ bataa tenŋ tenŋ pa-i, miŋ tu tiŋ i a daŋ pa-a ɲaan wɔ̀ tɛ.

¹² Yibɛɛ ábɛɛ racin-i, yi i á siratu, yi i ǹʼbi furu á tɛ, tu á tiri kɛɲɛ Kirinŋ dintɛ bi ki wu. Mìnki ábɛɛ dɔri-i, nwɔma á i de awɔ̀ masabi ki ru, niŋ fa a nɔɔri ki ru.

Tɛsalonikitɔnŋ kiri wɔ bilinabi ki fa kɔ́ɔ́ makwulubi kiri

¹³ Yibɛɛ i baraka bi-a Kirinŋ tɛ waarinŋ bataa ru ábɛɛ bira, sabu yibɛɛ Kirinŋ wɔ wulu wɔ̀ bi-i ábɛɛ tɛ, ábɛɛ niŋ ji konanmini tɔnŋ na wulu gbansanŋ i kì. Ábɛɛ ǹʼji-i Kirinŋ dariwulu ki yɛrima ki i. Mìnki dumiŋ i ji-i sɛli ki ra. Ábɛɛ wɔ̀ri bili-i niŋ wulu ki ra, ŋì i baara ki ma-a ábɛɛ ciiru.

¹⁴ Yibɛɛ tindaŋ ni, Kirinŋ wɔ konanbi kwuru wɔ̀ri i Yude sɔɔta ki ru, kí i ji bilinabi ki ma Yesu Kirisa ra, ábɛɛ nini naki-i, sabu ábɔɔ konanbi ki á cɔɔri-i ɲaan wɔ̀ tɛ, Yawutu kiri kíbɛɛ cɔɔri-i mìŋ ɲaan tenŋ ki tɛ.

¹⁵ Mìŋ Yawutu kiri Ŋuntiŋ Yesu kilɛn-i, kí i cintɔnŋ kiri kilɛn sɛbɛ. Kí i ji yibɛɛ yɛrima kiri cɔɔri. Kɔ́ɔ́ bidi Kirinŋ tɛ kì, niŋ fa kí i ji koŋ bataa ɲa a.

¹⁶ Kí i ǹʼtɛ arì i yibɛɛ suu Kirinŋ wɔ mwubi ki wulu ki sunjo ki sun shiya tɔri kiri tɛ. Niŋ ɲaan ki tɛ, kí i ǹʼbɛɛ bo ta-ri arɔɔ bijɛ kiri sun waarinŋ bataa ru. Nka, Kirinŋ wɔ tɔnkwulu ki rakɔɔra a fɛɛn kí sun.

Pooli i a miiri-ra Tɛsalonikitɔnŋ kiri bi sun

¹⁷ Ńʼtindaŋ ni, yibɛɛ yi san-i ábɛɛ ra waaci pyaanŋ nu, niŋ ji-i firi ki ra, nka yibɛɛ ɲakili ki san ábɛɛ bi sun kì. Yibɛɛ wuru ǹʼtɛ ɲaan ki bataa tɛ, yi i yi pwulu ta ábɛɛ ja sɛbɛ, sabu ábɛɛ fyii sinaŋ tu-i yibɛɛ ru.

¹⁸ Yibɛɛ wuru ǹʼtɛ, yi i ta po ábɛɛ tɛ nmaŋ, míŋ Pooli, míŋ ábɛɛ tɛ ta ki gbɛbili-i, kaan tenŋ i kì, nka shitaanni ki yibɛɛ suu ta ki sun.

¹⁹ Nkɛnŋ ni yibɛɛ gbɛbilimaŋ ki fa yi ciirudi ŋuŋ ki fa yɔɔ ŋununfɛshi ŋuŋ ki i Yesu Kirisa ɲaanfɛ? Ábɛɛ kiri niŋ i, Ŋuntiŋ Yesu ɲaanfɛ, a na shikaŋ ki ru kì wa?

²⁰ Sɛli ki ra, ábɛɛ kiri i yibɔɔ ŋununfɛshi ŋuŋ ki fa yi ciirudi ŋuŋ ki i.