1 Jan 1 - Di Jamiekan Nyuu Testiment

¹ Di wan we niem di Wod we did de bout fram wie bak wen kom dong a ort tu wi. Wi did ier di Wod wid wi uona iez, si it wid wi uona yai dem, an toch it wid wi uon tuu an dem. A da siem Wod ya wi a tel unu bout.

² A da siem laif de shuo itself tu wi. Wi si it, an wi a tel unu wa wi si. Wi a tel unu bout di siem laif we did de iina evn wid di Faada an we kom shuo itself tu wi.

³ Wa wi did si an ier a dat wi a tel unu tu. Wi a tel unu so dat unu kyan muuv kluos wid wi, an wi a muuv kluos wid di Faada an wid im Bwai Pikni Jiizas Krais.

⁴ Wi a rait fi tel unu dem sitn ya, kaaz it mek wi riili api fi tel unu.

Gad a Lait

⁵ Wi a tel unu di siem mesij we wi ier fram Jiizas Krais. Im tel wi se Gad eva du wa rait kaaz Gad a lait. Gad kyaahn du notn rang kaaz notn no iina im we kuda mek im du rang. Dat miin se no daaknis no iina im.

⁶ Ef wi se wi a muuv kluos wid Gad bot wi a liv iina di daak siem wie, a lai wi a tel, wi naa liv azkaadn tu di chuut.

⁷ Bot ef wi liv iina di lait siem laik Gad, wi a liv iina piis wid wan aneda. Da wie de Gad wash we aal a wi sin dem wid im Bwai Pikni blod.

⁸ Ef wi taak se wi neva sin wi onggl a fuul wiself an no chuut no iina wi.

⁹ Bot ef wi si se wi sin an beg Gad paadn, wi kyan nuo fi shuor se Gad wi paadn wi an wash we aal a wi sin dem.

¹⁰ Ef wi se wi no av no sin, wi a kaal Gad laiyad, an dat shuo se im Wod no iina wi aat at aal at aal.