YKan. 99 - Yus Papí: Shuarja̱i̱ Yus Yamaram Chicham Najanamu

Tunaarincha Yus shiir awajma

¹ ¡Jiuwaka akupkui! ¡Aentska kurainiak tákeer ajartatui! Kirupín téntakma Niṉkia ajapén pujawai. Núnisaṉ nuṉkasha muchitrati.

² Seúnnumka Jiuwaka uunt naṉkamantuiti. Tura ashí aentsnumsha páantin naat awajsamuiti.

³ Ame náaram naṉkamantu ashammai asamtai shiir awajtámsarti. ¡Nisha tunaarinchaiti!

⁴ Maa kakaram úunt akupniu aya nekasa nuke túriniaitme. Ámeka naka nuke chichawitme. Ámeka Israerja̱i̱sha aya naka nu túrakum nekasa nuja̱i̱ métek sumamtikiaitme.

⁵ Jiuwá ii Yusri̱ naṉkamantu paant awajsatarum tura Ni nawe̱ tarimsar pujutai̱ri̱n tikishmátratarum Niṉkia peṉké tunaarinchaiti.

⁶ Muisaiska Araunja̱i̱ nisha núnisaṉ Yúsnan pujurin armia nui̱ páchitkia ármiayi. Núnisaṉ Yusa náari̱n pachin armia nui̱ Samuirsha páchitkiauyayi. Tura Jiuwaka untsúam Nisha ai̱ wéarmiayi.

⁷ Yuraṉkim wajái̱ ámanumia̱ Yuska niji̱a̱i̱ chichasarmiayi tura Ni chichame̱ncha núnisan akupkámu umiktinian chichaman súsarmia nunasha tímiatrusaṉ umiarmiayi.

⁸ Ii Yusri̱ Jiuwá Ámeka ni seatmainiakuiṉkia anturkam ai̱wearmiame. Núnisaṉ Ámeka tsaṉkurkartin Yus áuyame tura ni yajauch túramuja̱i̱ métek akíarmiame.

⁹ Jiuwá ii Yusri̱ naṉkamantu paant awajsatarum. Tura Ni akantúkma náintri̱n tikishmátratarum Warí, ii Yusri̱ Jiuwaka peṉké tunaarinchaiti.