YKan. 98 - Yus Papí: Shuarja̱i̱ Yus Yamaram Chicham Najanamu

Yus nákak túrin asamtai shiir awajsamu

¹ ¡Yamaram kanta Jiuwá kantampruátarum. Warí aentstikia túrachminia túraiti! ¡Ni untsuuri̱ tura tunaari̱ncha kunturi̱ji̱a̱i̱ nupetmakuiti!

² Jiuwá Ni uwemtikkiartutairi̱n paant awajsaiti. ¡Tura uunt nuṉka mátsatkamu iimiainiamunam Ni nákak túrutai̱n paant iniakmasuiti!

³ Tura Ni waitnenkartutairi̱n tura nekas chichatairi̱ya nuna enentáimtus Israer shuarnaka yáiṉkiuiti. Tura ashí nuṉka náṉkatrainia ímianai pujuinia nu ii Yusri̱ uwemtikrampramun nékainiawai.

⁴ Ashí nuṉka matsatrumna nútirmeka Jiuwá warasrum kantampruátarum. Yus kanta kakaram kantamkuram uwej pákeer awajtiarum.

⁵ Jiuwá shiir awajkuram árpaja̱i̱ kantampruátarum. Arpa tura áme chichammiji̱a̱i̱ métek kantamáta.

⁶ Ii Akupniúri̱ Jiuwáa pujamunam tarum kachuja̱i̱ tura umputai̱ji̱a̱i̱ umpuitin náṉkamna nuja̱i̱ métek untsumkatarum.

⁷ Nayantsaka achitrainia núurtiuk núnisaṉ núṉkaka ashí írunna núurtiuk téter ajainiawai.

⁸ Entsatirmeka atumí uwejé̱ pákeer awajtiarum. Ashí naint árumna nútirmesha warastarum.

⁹ Jiuwá íimmianumka warastarum. Warí nuṉká matsatainian sumamtikiataj tusa winiawai. Túrak nuṉkanka nekasa nuja̱i̱ métek naka sumamtikiattui, aentsnasha núnisan tímiatrusan métekrak sumamtikiattawai.