YKan. 96 - Yus Papí: Shuarja̱i̱ Yus Yamaram Chicham Najanamu

Ashí nuṉkanmaya̱ Uunt Yus kantampramu

¹ ¡Uunt Yuska yamaram kanta kantampruátarum tura ashí nuṉkanmaya̱tirmesha núnisrumek Uunt Yus kantampruátarum!

² Uunt Yus kantampruátarum tura ni naari̱ shiir awajsatarum. Túrarum uwempratin chicham tuke tsawant shuarnum etserkatarum.

³ Ni naṉkamantu asamtai uunt nuṉka mátsatkamunmasha Ni winchari̱ etserkarum Nisha aents túrachminian iniakmasmia nusha áujmatsatarum.

⁴ Kame Uunt Yuska tí uuntaiti tura tí naṉkamantu asamtai arantúkrum tí peṉker awajsatarum. Warí ántar yus najankamu ainia núja̱i̱sha naṉkaamas Niṉkia ashamainti.

⁵ Chíkich nuṉka mátsatka ainia nuna yusri̱ṉkia aents najanamu áiniawai túrasha Uunt Yuska nayaimpin najanaiti.

⁶ Naṉkamanturi̱ṉkia tura winchari̱sha Nin eem áiniawai. Núnisaṉ Ni Shiir Awajtai̱ Je̱e̱nkia kakarmari̱sha tura shíirmari̱sha áiniawai.

⁷ Ashí uunt nuṉka mátsatkamu shuartirmeka, Uunt Yuska naṉkamantu enentáimtusrum kakarmaiti titiarum.

⁸ Uunt Yusa naari̱ naṉkamantu asamtai arantúkma enentáiji̱a̱i̱ shiir awajsatarum. Ántrarik súsatniusha Yus pujana nui̱ jukirum waya̱tarum.

⁹ Shíirmari̱ imiatkincha asamtai Uunt Yus tikishmátratarum. Tura ashí nuṉkanam matsatrumna nútirmeka Ni pujana nui̱ ashamakrum tákeer ajatarum.

¹⁰ Uunt nuṉka mátsatkamunam chichaakrum “¡Uunt Yuska akupeawai! Warí núṉkaka ti nekas amuchkachmin awajsar najanamuiti. Niṉkia aentsun nekasa nuja̱i̱ métek sumamtikiawartatui” titiarum.

¹¹ ¡Nayaimpitirmesha shiir enentáimkiuram warastarum! ¡Núnismek nuṉkáa, amesha warasta, nayantsá ashí írunna núurtiuk téter ajata!

^12-13 ¡Kampunniú, ámeka ashí írunna nuímiak shiir enentáimkiuram warastarum! Kame ashí numi kampunniunmaya̱ ainia nuka Uunt Yus winiamunmaani̱ eem wajas kantamáwartatui. Niṉkia aentsun sumamtikiawartaj tusa winiawai. Aentsun nekasa nuja̱i̱ métek túrataj tusa sumamtikiawartatui tura Ni chichakma tímiatrus aentsnum umiktatui.