YKan. 95 - Yus Papí: Shuarja̱i̱ Yus Yamaram Chicham Najanamu

Yus kantamprakur tikishmátrami tusar untsumma

¹ Winitiárum. Uunt Yus wararsar kantampruáwarmi. Kaya úuntnum ejamtai̱ya núnis iin uwemtikiarta asamtai ti warasar untsuktai.

² Kame ti shiir yúmiṉkiakur kanta kantamprukir, ni naari̱ naṉkamantu awajkur nekas enentáiji̱a̱i̱ Ni íimmianum weantkartai.

³ Warí ántar yus ainia núja̱i̱sha naṉkaamas Yuska ti úuntaiti.

⁴ Nuṉká initri̱ya̱ ímianaisha wainiui. Naint ti tsakaru ainia nusha Niniu áiniawai.

⁵ Nayantsasha ni najanamu asa Níniuiti tura nuṉkancha ju̱ju̱ptinian najanamiayi.

⁶ Wats iincha Uunt Yus najatma asakrin tikishmátrar shiir awajeakur wararsartai.

⁷ Warí Níṉkiti ii Yusri̱ṉkia tura shuar murikiun sá̱a̱knium matsas wáinniua núnis iincha wáitmaji. Yamaikia Yus tana nu ántakrumka

⁸ nakittsuk shiir anturkatarum. Warí, yaunchu Israer shuartiram Miripia tura Masa atsá nuṉkanam wekasarum

⁹ atumí uuntri̱ Wi túramun wáinkiariat Winia nakitruiniak nekaprusar akajtukarmiayi.

¹⁰ Tuma ásarmatai kuaraintia uwí nu aentsun kajerkaran chicharainiakun “Ju̱ shuar peṉké ántichu áiniawai. Tuma ásar Winia chichamprun umirtuiniatsui.

¹¹ Nuja̱i̱ kajerkaran nekas túrattajai tákun wiji̱a̱i̱ shiir pujusárat tusan tsaṉkatkachartatjai tímiajai” tímiayi Uunt Yus.