YKan. 93 - Yus Papí: Shuarja̱i̱ Yus Yamaram Chicham Najanamu

Jiuwáa akupeamuri̱nkia náṉkatkachuiti

¹ ¡Jiuwaka akupeawai! ¡Nisha jíitsumpran entsaruiti! ¡Jiuwá tí kakarmari̱ji̱a̱i̱ iwiarnaruiti! ¡Jiuwaka nuṉkanka muchitkiachmin awajás apujsaiti!

² Ámeka akupkur pujutái̱rmeka tímianiaṉ tímiatruskete ¡Ámeka tuke pujuwitme!

³ Maaj, Jiuwáa entsa takuniarai. Entsasha takuniar uu ajainiawai. Tura entsá tampari̱ takuniar téter ajainiawai.

⁴ Jiuwaka entsa irunna ti kakantar téter ajana núja̱i̱sha naṉkaamas nayaimpinmaṉka kakarmaiti. Nayantsa tampari̱ nupetkachminia núja̱i̱sha naṉkaamas tsuumainti.

⁵ Maaj Uuntá, Ame akupkámuka peṉké yapaji̱áchminiaiti. Ame Je̱e̱mka ti shiir imiatkinchaja̱i̱ iwiarkar tuke shíirmach awajsamuiti.