YKan. 91 - Yus Papí: Shuarja̱i̱ Yus Yamaram Chicham Najanamu

Uunt Yusai̱ weankar péṉker wainkiamuitji

¹ Uunt Yusai̱ weatka nuka Ashí Tujintkiachu Yus ayamprúkma pujustatui.

² Úunt Yusrun chicharkun “Winia ayamprutkatniumka tura ejatkatniumka Ameketme. Tuma asakmin aya Áminiak enentáimtustiniaitjiame” títiatjai.

³ Warí aya Niṉki itiurchatnumia̱ tura ashí jakamnia suṉkurnumia̱ uwemtikramprattawai.

⁴ Tura atash uchichíri̱n wear etektus pujurna áitkias pujurtamkui ejamtiatme. Kame nekas chichamtin asa tantara ánis ayamprutmaktatui.

⁵ Kashi sapijmiakminia nu tura tsawái̱ naṉki naṉkatamainiakuisha

⁶ núnismek kiritniunmaya̱ tura tsawai̱ya̱ jatai̱ suṉkur wekáa mantuawainti tusam ashamkaip.

⁷ Menaarmiiṉkia mir tura untsuurumiini̱ṉkia tias mir aents káutramkarsha peṉké itiurtámkachartatui.

⁸ Tuma asamtai imia amek Yusan enentáimtichu asutíniamusha wainkiattame.

⁹ “Uunt Yus nayaimpiniam pujana nuka winia ejatniuiti tura winia ayamprutniuiti” tame.

¹⁰ Tau asam itiurchatcha wáinkiashtatme. Núnisaṉ suṉkursha achirmákchattawai.

¹¹ Tuma asa Uunt Yus ame tui̱ wekaittiam nui̱sha ni suntari̱n waitmakarat tusa akuptúrmaktatui.

¹² Áintsaṉ kayanam ajiintsumni̱ṉ ni uwejé̱ja̱i̱ weṉkurmaktatui. Mat. 4:6

¹³ Winia kakarmarja̱i̱ úunt ya̱wa̱sha tura uchirí̱sha nupetkattame nuyá̱ najamin napisha najartatme tajai.

¹⁴ “Warí Winia anenta nuna uwemtikrattajai. Tura Winia nekara núnaka naṉkamantu awajsattajai.

¹⁵ Tura ni seatkuiṉkia anturkan ái̱ktatjai. Núnisaṉ ni waitia nui̱sha pujuru asan yáiṉkian páantin awajsattajai.

¹⁶ Nui̱ṉkia untsurí uwí iwiaaku pujustinian susattajai. Túram Wi uwemtikramun nekáa warastatui” tawai Uunt Yus.