YKan. 90 - Yus Papí: Shuarja̱i̱ Yus Yamaram Chicham Najanamu

Aentska amuiniaiti tura Yuska tuke pujuwiti Muisais Yusa takarniúri̱ Yus seamu

¹ Uuntá Ámeka yáunchusha tura yamaisha nuyá̱ ukunam matsamártatna nunasha ejamtairi̱yaitme.

² Náintiash najana apujtsuk nuṉkasha tura ashí nui̱ irunainia nusha najantsuk yama náṉkamtaikniumia̱sha yáunchusha yamaisha tuke pujú Yúsaitme. Isa. 41:4; Apu. 1:11; 22:13

³ Ame chicharkum “Jákatin aentsu nuṉká waketkitia” tákumniṉkia aentska ataksha nuṉka ajawai.

⁴ Kame mir uwikia Ámiji̱a̱i̱ṉkia tsawant yau naṉkaamasma núnisaiti. Tura nuna arant kashi ishichik ura iistá tusar apujsamu tsawantri̱ wárik naṉkaama núniniaiti. 2 Pit. 3:8

⁵ Iinkia entsa nujaṉkrua jukartana núnisam jukartame. Tura iikia kanarua núniniaitji. Iisha nupa̱a̱ káshik tsapana núnisketji.

⁶ Núpa̱a̱ka káshikkia tsakar ku̱ku̱jrawai tura kí̱arai̱ṉkia tsupikiam ja̱ja̱tar kaawai.

⁷ Warí Ame suírumji̱a̱i̱ amukmaitji tura Ame kajetáirmiji̱a̱i̱ sapijmiaku pujuiniaji.

⁸ Ii yajauchiri̱sha Ámeka paant wainme. Ii u̱ka yajauch túramuri̱sha Ame tsáapnintrumji̱a̱i̱ṉkia paant awajme.

⁹ Ashí ii tsawantri̱nkia Ame kajetáirmiji̱a̱i̱ amuiniaiti, ii uwiri̱sha enentáimsamu naṉkaama núnisaiti.

¹⁰ Ii iwiaaku pujustin tsawantka sataintia uwichikiti tura ti kakaram ainia nuka uchaintia uwí pujuiniawai. Tura ti iwiaaku pujamsha ti ititiaiti tura takataiti tura ii uwiri̱sha wari naṉkaamawai iisha yajá wéaji.

¹¹ Ame kakaram kajetáirmincha ¿ya nekaamniait? Tura Ame kajetairmeka ti uunt asamtai ¿itiur ashamkar arantúkchamusha átatam?

¹² Ii iwiaakmari̱ sútarchia nu nekamatin unuikiarturta. Nuja̱i̱ nekatai̱ enentai takustatji.

¹³ Jiuwaá ¿urutáik iincha waketkitiam? Ame takartámin ainia nusha waitnentrarta.

¹⁴ Tuke káshik Ame waitnenkartutairmiji̱a̱i̱ pimiuntikratkata túrawakminkia iwiaaku pujutaj nuiṉkia warasar tuke kantamiartatji.

¹⁵ Iin wáitkiartusmam imianú tsawantak tura nukapé uwí yajauch wainkiamajnia nuja̱i̱ métek waramtikiartusta.

¹⁶ Ame najankamurmesha Ame takartámin ainia nui̱ paant ajasti. Tura Ame páantniurmesha nuna uchirí̱ ainia nui̱ paant ajasti.

¹⁷ Jiuwá ii Yusri̱ waitnenkartutairi̱ iin pujurtamsatji. Ii takatrí̱sha ipiampárta. Ee, nekas ii takatrí̱sha ipiampárta.