YKan. 9 - Yus Papí: Shuarja̱i̱ Yus Yamaram Chicham Najanamu

Yus naka túrin asamtai yúmiṉkiamu

Kantamtikniun ju̱ kanta Tawit áaruiti.

¹ Maa Uunt Yusá, wikia tuke winia enentái̱rja̱i̱ shiir awajsattajme. Tura aents túrachmin ashí najankaitmena nunasha áujmatsartatjai.

² Ámin shiir enentáimtakun wararsattajme. Ashí Naṉkamantuu, Ame náarmin shiir awajkun Ámin kantampruáttajme.

³ Winia nemasur úkumur waketainiak Ame íimmianum iniarar amuukarmai.

⁴ Winia naka túramna nu ayamprutkame túram nekasa nuja̱i̱ métek túrutai̱ji̱a̱i̱ sumamtiktai̱ pujutai̱nium pujusúme.

⁵ Uunt nuṉka mátsatkamu ainia nusha chicharkaruitme túram Yusan enentáimtichu ainia nusha emeskaruitme túram ni náari̱ṉkia atakka enentáimtunsashtin tuke asakátraruitme.

⁶ Winia nemasruka matsatainiatsui tura ni pépruri̱sha emestukarmame túram yáakesh ní enentáimtutai̱ṉkia niji̱a̱i̱ amukármai.

⁷ Túrasha Uunt Yuska tuke pujuwiti. Tuma asa nekasa nuja̱i̱ métek iis nekaawarat tusa Ni akuptai̱ pujutái̱ri̱n apujsamuiti.

⁸ Ni naka túrutai̱ji̱a̱i̱ aents túramuja̱i̱ métek wainiak nekaawartatui.

⁹ Uunt Yuska wáitkiasma matsatáinia nuna úmtairi̱nti tura jakamnia enentáimiainiana nui̱sha úmtainti.

¹⁰ Ame náarmin nékainia nuka Ámin enentáimturmasartatui Uunt Yusá tura e̱a̱tmakarma nuka Ámeka ajapa iniaisacharuitme.

¹¹ Uunt Yus Seúnnum akuptáinium pujuwiti. Ni kantampruátarum. Nu arant Ni najankamuri̱ aents matsatainiamunmasha etseratarum.

¹² Tunamkachun Yapajmiátniuka tuke enentáimtuiniawai tura wáitkiasma pujuinia nusha untsumkuiṉkia kajinmatainiatsui.

¹³ Uunt Yusá, winia waitnentrurta. Ame jatai̱ wáitinmaya̱ iniantukmin asam winia nakitruiniak itiurchat najatruiniana nu íisarta.

¹⁴ Seunna nawantri̱ wáitiri̱n Ámin ashí shiir awajtámsatniun áujmattsarti tura ame uwemtikkiartutairmiin warastatjai.

¹⁵ Uunt nuṉka mátsatkamu ainia nuka wa̱a̱ tá̱i̱wiarma nui̱ṉ waya̱warai tura neka nenamunam nawe̱nam nemakarmai.

¹⁶ Uunt Yuska nekasa nuja̱i̱ métek sumamtikniun túrama nuna nekaamai núnisaṉ Yusan enentáimtichu ainia nuka ni najanamunmaṉ nemakarmai. (Séraj)

¹⁷ Yusan enentáimtichu ainia nusha tura ashí uunt nuṉka mátsatkamunam Yusan kajinmatainia nuka jakaa matsatainiam junakiartatui.

¹⁸ Atsumin ainia nuka tuke kajinmátkimiu áchartatui tura kuítrincha ainia nu péṉker átinian nákamua nuka niṉkia túkeka meṉkatukchartatui.

¹⁹ ¡Maa Uunt Yusá nupetmakta! ¡Ámin aents nupettamkashti! Tura uunt nuṉka mátsatkamu ainia nu Ame íimmianum sumamtikiawarta.

²⁰ Uunt Yusá, aents sápij eṉketáwarta. Tura uunt nuṉka mátsatkamu ainia nusha aya áentsketji tu enentáimias nekamawarti. (Séraj)