YKan. 88 - Yus Papí: Shuarja̱i̱ Yus Yamaram Chicham Najanamu

Jákatniunam pujusár seamu

Ju̱ kanta kantamtikniun áatar súsaiti. Kurái uchirí̱ kantamámu. Maski kanta jintíatin Istra wea Jiman arma.

¹ Jiuwáa winia uwemtikrin Yusru tsawai̱sha káshisha Ame íimmianum pujusan untsúajme.

² Wi seamurka Ame pujamunam jeartamti. Wi Ámin untsúajmena nu anturtukta.

³ ¡Wikia wáitiakum ti itiurchatnum pujajai tuma asan jakar iwiarnastinian ishichik ajasjai!

⁴ ¡Wíniaka chíkichka jaka iwiarma núnis iirainiawai! ¡Wisha áishmaṉ kakarmari̱ amutukma núnikjiai!

⁵ Wisha jákaru ajapamunam ajapar iniaisámua núnikjiai. Tura mesetnum maamu iwiarsamu tepena núnikjiai warí nisha páchiniatsme. Nisha Ame uwejmíya̱ṉka kanakaruiti.

⁶ Wa̱a̱ tí init tá̱i̱miunam tura tee init ámanum apujtusume.

⁷ Ame kajekmaram winia mash apujturame. Kame Ame wáitkiasma asan nayantsa tampari̱ ukatak ataksha ukatak awajna nútikrame. (Séraj)

⁸ Winia amikiur arma nusha arant awajtúrsarume túram wíniaka mui̱jmiai̱ iirainiawai. Wikia eṉkear epenmia pujakun jíinkitniun tujintiajai.

⁹ Winia wáitiamurja̱i̱ winia jí̱rusha mushatmararai. Tuke tsawant Jiuwá untsukmajme túran winia uwejrun Ámin iwiaintiukmajme.

¹⁰ ¿Jákaru ainia nuash aents túrachmin Ame túram iniaktustam? ¿Jákaru ainia nuash nantakiar shiir awajtámsarat? (Séraj)

¹¹ ¿Ame waitnenkartutairmeka jákaru iwiarsamu pujuinia nui̱ṉᵏⁱ etsernaktata nuí̱chuka Ame nekas túrutairmeka iwiarsam meṉkakarua nui̱ṉᵏⁱ áujmatnastata?

¹² ¿Ame aents túrachmin túriniaitmena nuka kiritniua nui̱ṉᵏⁱ nekanatta? ¿Tura nekasa nuja̱i̱ métek túrutairmin jakar kajinmatai nuṉkanam matsatainia nuyá̱ etserkamnia áwak?

¹³ ¡Warí, Jiuwáa wikia Ámin untsúajme! ¡Tuke káshik Ámin wikia yaintkiai tusan áujeajme!

¹⁴ Jiuwaá ¿urukamtai wíniaka nakitrurum? ¿Urukamtai Ame yapimsha winiasha ú̱rtam?

¹⁵ Wikia natsa ámiaj tímianaiya̱ṉ wáitsatniunam jakamnianum tura sapijji̱a̱i̱ warí urukawajak tu enentáimpramjai.

¹⁶ Ame kajetáiram winia tarutní̱. Ame ti tsuumai̱ túram nu sapijmiámtikruk tí awaktukai.

¹⁷ ¡Tura Ame kajetáiram entsa tuke ama̱a̱rak amukrattsan pujana nútikrua takamtsuk eṉketak pujurtawai!

¹⁸ Wi tsaníakmarsha tura amikrusha wini̱ya̱ arant awajtúrsame túram kiritia nu winia amikrua núnis yamaikia ajasái.