YKan. 87 - Yus Papí: Shuarja̱i̱ Yus Yamaram Chicham Najanamu

Yusa pépruri̱ timiá shiira nu

Kurái uchirí̱ kantamámu.

¹ Yuska Ni akantúkma naintnium pépruri̱ tépakmari̱nkia apujaiti.

² Jakupa pujutái̱ri̱ áinian anea nuna naṉkaamas Jiuwá Seuna wá̱i̱ti̱a̱i̱ri̱ ainia nuna anenawai.

³ Yusa pépruri̱ya̱ ti shiir páantin írunna nuna Áminiun áujmatnawai. (Séraj)

⁴ Winia nekarainia nuya̱n ujumek anairattajai Rajapan tura Papirúnian núnisaṉ Jiristíu, Tiru nuyá̱ Itiupía. Iiskia nusha nui̱ akiiniaiti.

⁵ Seúnkan áujmatainiak chichainiak “Ju̱ka tura niṉkia nui̱ akiinia áiniawai” tunattui. Ashí Naṉkamantua imiá Niṉki úmuchkachmin awajás apujsattui.

⁶ Jiuwá pepru náari̱n anujtiartatna nui̱ nincha Rajapan pe̱a̱k chichaak “Ju̱ka Seúnnum akiiniaiti” títiatui.

⁷ Tura kantamáinia tura ijiamainia nu chichainiak “Ashí púkuni iini̱ya̱ jiinia nusha Amiiní̱ya̱n waawai” tiártatui.