YKan. 86 - Yus Papí: Shuarja̱i̱ Yus Yamaram Chicham Najanamu

Yus waitnentruki̱ wetí tusar seamu

Tawit Yusan seamu

¹ Jiuwáa anturtukam ái̱rkata. Warí wait ajá pujakun atsuma pujajai.

² Wikia ¿Amiiniak? enentáimtin asamtai wínia wakaniur waitrukta. Winia Yusruá Ame takartámin Amiiniak nekas enentáimturmawa nu uwemtikrata.

³ Jiuwáa winia waitnentrurta. Warí, ashí tsawant Ámin untsúajme.

⁴ Ame takartámniu wakaní̱sha waramtiksata. Warí Uuntá winia enentái̱rnaka Ámin íktusjame.

⁵ Warí Uuntá Ámeka péṉkeraitme tura tsaṉkurkartiniaitme. Ame uunt waitnenkartutairmiji̱a̱i̱ ashí Ámin untsurmainia nuka waitnenniuitme.

⁶ Jiuwaá wi seajmena nusha antukta tura wi chichasan untsumaj nusha anturtukta.

⁷ Jakamnia nekapeamunmaya̱ tsawantin Ame ai̱rkai tusan untsuktatjame tura Ámeka ai̱rkattame.

⁸ Uuntá ántar yus ainia nusha Ámiji̱a̱i̱ métekka peṉké atsawai. Núnisaṉ Ame najantkamurmiji̱a̱i̱ métekka peṉké atsawai.

⁹ Ashí uunt nuṉka mátsatkamu Ame najantkamamna nu Ame pujamunam taar tikishmátramprartatui. Túrawar Ame náarmincha páantin shiir awajsártatui.

¹⁰ Warí Ámeka tí uuntaitme tura aents túrachminia nu túriniaitme. Aya Amek Yúsaitme.

¹¹ Jiuwáa Ame jintim nekaprutáta túrawakmin Ame jintimín naka wekaasataj. Amiiniak esetran enentáimtin átaj túran Ame náarmin arantúkan ashamkataj.

¹² Maa winia Jiuwáa Yusru takamtsuk winia enentái̱rja̱i̱ shiir awajsattajme túran Ame náarminkia tuke naṉkamantu awajsattajai.

¹³ Warí, Ame waitnentram nuka tí úuntaiti. Túram winia jaka matsamtai̱niam Seúrnum init pujustinniumia̱ aṉkant awajtúsuitme.

¹⁴ Yusá naṉkamantu enentáimtuma ainia nu winia wajatrurarai tura maṉkartin ainia nuka mantuataj turutainiawai. Tura nu aents ainia nusha aranturmaktinian nékainiatsui.

¹⁵ Túrasha Ámeka Uuntá waitnenkartin péṉker aneaku Yúsaitme. Núnisaṉ wárik kajechuitme tura waitnenkartutairmeka tura nekasa nu túrutairmesha amuichaiti.

¹⁶ Wini̱ni̱ waketkim íirsata túram waitnentrurta. Ame takarniúram Ame kakarmaram susata tura uwemtikrurta nuwa̱ Ame takartámniun uchirí̱ntjiai.

¹⁷ ¡Ame túramurmiji̱a̱i̱ aneṉkrattairam iniaktursata! Ame Jiuwá yaintkiam atsaṉtamna nuna wáinkiar muí̱jruinia nu natsa̱a̱rarat.