YKan. 85 - Yus Papí: Shuarja̱i̱ Yus Yamaram Chicham Najanamu

Yus waitnentrurat tusa untsúamu

Ju̱ kanta kantamtikniun áatar súsaiti. Kurái uchirí̱ kantamámu.

¹ Maa Jiuwaá Ámeka Ame shuarum waitnentrarmame túram Jakup aents achirar yaruakma awakearmame.

² Ame shuarumi yajauchiri̱ṉkia tsaṉkurarmame túram ashí ni tunaari̱ṉkia nukurkarmame. (Séraj)

³ Ame kajetairmeka ashí emetamame túram Ame suir kaje̱ntkamusha Amiya̱ṉka akankaitme.

⁴ ¡Ii uwemtikkiartin Yusá ataksha Ámin awaṉkartuktia túram Ame iin kajerkartamna nuka iniaisata!

⁵ ¿Iincha tuke kajertamkimik wétatam? ¿Ámeka ukunam matsamiartatna nusha kajerkiarmekek wéartatam?

⁶ ¿Ame shuarum ainia nuka atakka iwiaakmaka súsachartatmek Ámin warasarat tusamka?

⁷ Maa Jiuwaá Ame waitnenkartutairam iin amasta túram Ame uwemtikkiartutairam sukartusta.

⁸ Jiuwá Yus títiatna nuna antuktatjai. Ni shuari̱ Yusan arantuk wekain ainia nuna Niṉkia waurka ajastinnium waketkiara̱i̱ṉ tusa aṉkant shiir matsamsatniun nekas susattajai tawai.

⁹ Ii nuṉke̱n Ni winchari̱ pujusat tusa ti nekas arantuk ashampramainia nuna uwempratniuri̱nkia ishichik ajasái.

¹⁰ Waitnenkartutai̱ nekasa nuja̱i̱ wainniaikiarmai tura nákak túrutai̱ aṉkantin shiira nuja̱i̱ meje̱naisarmai.

¹¹ Nekasa nuka nuṉkaya̱ tsapái̱ jíintiatui tura nekasa nuja̱i̱ métek túrutaiṉkia nayaimpinmaya̱n íittiawai.

¹² Nu arant Jiuwá péṉkernak amastatji tura ii nuṉke̱sha péṉkeran nerektatui.

¹³ Nekasa nuja̱i̱ métek túrutai̱ jintia iwiarki̱ emkittiawai Ni wekaasatniuri̱n.