YKan. 84 - Yus Papí: Shuarja̱i̱ Yus Yamaram Chicham Najanamu

Yusai̱ pujustin timiá shíiraiti.

Ju̱ kantan kantamtikniun áatar súsaiti. Nusha “Uwa Neketai̱” tama kanta kantamámua nuja̱i̱ métek nakumsar kantamátniuiti. Kurái uchirí̱ kantamámu.

¹ Jiuwáa Nayaimpinmaya̱ Suntara Uuntri̱ Ame Je̱e̱min pujustinkia imiá shíiraiti.

² ¡Winia wakantruka Jiuwá je̱e̱ á̱a̱ri̱ncha pujustinian ti wakerawai! ¡Winia enentái̱rka tura winia aya̱shrusha iwiaaku Yusan kantampruiniawai!

³ Warí Jiuwá Nayaimpinmaya̱ Suntara Uuntri̱, winia Yusru tura winia úunt akupniuru ti pinchuchiṉkisha pujutachiri̱n najana núnisaṉ shuírpipsha pasuṉmas Yus aestutai̱ ainia nui̱ tíjiu̱ch uchichirí̱n chumpiniawai.

⁴ ¡Ame Je̱e̱min matsatainia nuka ti shiir awajsamu áiniawai! ¡Nisha iniaitsuk tuke Ámin shiir awajtámsartatui! (Séraj)

⁵ ¡Kame Amiiní̱ya̱n kakarman wainiainia nuka shiir awajsamu áiniawai tura ni enentáinkia aya Ame jintimín enentáimtusar wekainiawai!

⁶ Nea̱jik nuṉka pakarí̱n púkuni jíintrattui. Tura nuna pakarí̱n yumisha ti shiir awajsattui.

⁷ Seúnnum Yusan wáinkiatai tusar kaka̱a̱kiar nuna kakaram ajakiar Yusai̱ jeainiawai.

⁸ Jiuwá Nayaimpinmaya̱ Suntara Uuntri̱ Yus ¡wi seajmena nu anturtukta! Jakupa Yusri̱yá ¡antukta! (Séraj)

⁹ Yusá ii tantari̱yá íimsata. Áminiuiti tusar anaikiamu muuknum asuitiji̱a̱i̱ ukatkámua nu waitnentram yapí̱ íirsata.

¹⁰ Ántrar mir tsawant yajá pujusma nuja̱i̱ naṉkaamaska nekaska Ame pujutairmi á̱a̱ri̱n chikichik tsawantak pujustiṉ timiá péṉkeraiti. Tura Yusan enentáimtichu matsatainiamunam pachinkian pujutsuk antsu wikia winia Yusru Je̱e̱ wáitiri̱n pujustaj tusan wakerajai.

¹¹ Jiuwá Yus Ámeka étsa̱yaitme tura tantaraitme. Tura Amek péṉker jintian apapéna nuka waitnentraram páantin awajme túram ashí Amiya̱ péṉkera nuka suritchaitme. Mat. 6:33

¹² ¡Jiuwá Nayaimpinmaya̱ Suntara Uuntri̱ Ámin nekas enentáimturmainia nuka ti shiir awajsamu áiniawai!