YKan. 83 - Yus Papí: Shuarja̱i̱ Yus Yamaram Chicham Najanamu

Israera nemasri̱n asutiát tusar seamu

Asap kantamámu

¹ Maa Yusru, takamat pujusaip. Tura chichatsuk pujusaip. Yusru mítiat pujusaip.

² Nekaata Ame nemasrumka júrur ajainiawai tura Ámin muí̱jramainia nuka wi nekapnaisataj turamainiawai.

³ Amé shuar ainia núnaka chíkich shuaraimiak ánermak yajauch chichaman ú̱san jurusárai. Nusha Ame wáinmena nuna emeskatai tusar iruntrar chichaman jurusárai.

⁴ Nuyá̱ chichainiak “Winitiárum Israer emesrarmi túram atakka ni uunt nuṉka mátsatka Israera náari̱nkia peṉké enentáimtuschamu atí” tuíniawai.

⁵ Tura kajertamainiak irunturmarar chikichik enentáiniak umiktai tusar jurutrámsarai. Túrawar Amiji̱a̱i̱ mániatai tusar chichaman najatramawarai.

⁶ Nusha jutai̱ je̱a̱nam pujuinia nu áiniawai. Etum tura Ismaer aents núnisaṉ Muap tura Akaar aents wea,

⁷ ántsaṉ Kipir aents Amun nuyá̱ Amarík tura Jiristíu aents tura Tírunmaya̱ mátsatka ainia nuí̱miak irunturmararai.

⁸ Núnisaṉ Asirianmaya̱ aentsja̱i̱ irunturmarar Raut wean yáiniawai. (Séraj)

⁹ Nisha Matian warí itiurkamam nútikiawarta. Núnismek Kisun ashintsanam Sésara Japinji̱a̱i̱ warí itiur asutiámam nútikiawarta.

¹⁰ Nisha Enturnum nupetnakar kaji̱nkiarmai túrunawar nuṉká ijia tepana nútiknawarmai.

¹¹ Urep tura Seep itiur túrawarmam núnismek au aentsu uuntri̱ ainia núnasha túrawarta. Núnisaṉ Sépaj tura Sarmuna itiur túrawarmam núnismek ashí au akupniu uchirí̱sha túrutawarta.

¹² Warí nisha chichainiak “Yusa sa̱a̱kri̱ ainia nu ii akintruktai” tuíniawai.

¹³ ¡Maa winia Yusru nase wainchi péper ajakí̱ nuṉká ju̱yu̱ri̱ júana nútikiawarta. Tura trikiu saepe̱n nase yarumna nútikiawarta!

¹⁴ Ji keek kampunniunam numin aesak amúa nútiksamek aeskarta tura nisha kampuntin keak naintian amukí̱ wéana nútikiawarta.

¹⁵ Ame nasermiji̱a̱i̱ apapékta tura Ame uunt nasermiji̱a̱i̱sha ashamtikiaram ukurkarta.

¹⁶ Túrunawar natsanmai̱ ajakar Jiuwaá Ámin nekarmawartaj tusar Ame náarmin e̱a̱tmakarti.

¹⁷ Tura natsanmai̱ itit tuke awajtai̱ ártí túram páchishtai̱ matsamás amuukarti.

¹⁸ Ame náaram Jiuwayaitmena nuna nekarmawarti. Tura aya Amek ashí nuṉkanam Ashí Naṉkamantuitmena nuna nekarmawarti.