YKan. 81 - Yus Papí: Shuarja̱i̱ Yus Yamaram Chicham Najanamu

Yus waitnentamaitiat Israer shuar antukchamu

Asap kantamámu

¹ Yuska iin ikiakátmaitji warasar kantampruatai. Jakupa Yúsri̱nkia tí warasam untsukta.

² Shiir awajkum kantamáta túram panteruja̱i̱ nuyá̱ árpaja̱i̱ jikiá jikiamat tuntuiyata tura tuntuitiai̱ neturmaja̱i̱ tuntuiyata.

³ Yamaram nantu takamtai kachu umpuarta. Tura nayantumamtaisha kachu umpuarta. Warí tesamu tsawantka akantúkma ti shiir ii namperi̱nti. Wek. 10:10

⁴ Ju̱ akupkámusha Israer shuarnaiti. Jakupa Yusri̱ akupkámu umiktin chichamaiti.

⁵ Ejiptu nuṉkanmaya̱ jiinkimia nui̱ Jusen pachis umiktin chichaman najanamiayi. Wi nui̱ nékachma chichaman antukmajai.

⁶ Tí kijin aentskar waitkiamunmaya̱ṉka wi aṉkant awajsámajme. Núnisaṉ ame uwejmesha chaṉkin kijin júkitniunka iniaisarmai.

⁷ Wáitiakum untsumkamame túrawakmin wi aṉkant awajsámajme. Ipiamtaja̱i̱ páchitra ái̱kmajme tura Miripia entsa nui̱sha nekapsamajme. Jiin. 2:23; 14:10; Wek. 20:13 (Séraj)

⁸ Maa Wi shuará anturtukta anearai tusan chicharkattajme. ¡Wikia Israer shuar tí urutmatsuk anturtukarat tusan wakeraj!

⁹ Ántar yus najantkamu ainia nu atumínkia atsutniuiti. Chíkich yus ainia nu tikishmáttrairap. Jiin. 20:3,23; Muis. 5:6,7

¹⁰ Jiuwá ame Yúsrum Ejiptu nuṉkanmaya̱ jusamiajrumna nu Witjiai. Waṉkata Wi ejematkiartatjame.

¹¹ Túrasha Winia shuaruka Winia chichamprun anturtukcharmai. Israer shuarka Wíniaka nakitrurarmai.

¹² Enentáim ti katsuram asamtai ame wakeramuram túrak tusan ajapa iniaisámajme.

¹³ ¡Maa Wi shuará anturtukuitkiumni̱ṉkia tura Israerá Wi tama umikiam wekaasaitkiumni̱ṉkia

¹⁴ ame nemasrumnia̱ka nú chichamaik péejchach awajsarajai. Tura ámin kajertamainia núnaka wajatra̱a̱jai!

¹⁵ Winia nakitruinia nuka Winí̱ péejchach awajnása̱a̱yi. Tura Wi, Jiuwá tuke waitias matsamin awajsarajai.

¹⁶ Túrasha Áminkia Yuska tí peṉker tríkiun ayurtamawara̱a̱yi tura ame kitiamamuram imikrai tusa muchiṉnumia̱ míshkin átmara̱a̱yi.