YKan. 80 - Yus Papí: Shuarja̱i̱ Yus Yamaram Chicham Najanamu

Yusai̱ ataksha waketkitiaj tusar seamu

Asap kantamámu

¹ Israer shuar wáinniuitmena nu antukta. Murikiu wainniua núnisam Jusé ámeka wainkiam ewekámme. Kirupín ainia nu matsatmanum ajapén pujutainiam Ámeka tsáapin ajasam pujusta.

² Epraincha Piṉjiamíncha tura Manaséssha iimiainiamunam Ame kakarmaram iniakmasam uwemtikkiarturtaj tusam winitiá.

³ Yusá, shiir enentáiji̱a̱i̱ íikrattsam áwaṉkartukim uwemtikkiarturta.

⁴ Jiuwá Nayaimpinmaya̱ Suntara Uuntri̱ Yus ¿urutáik Amé shuar seatmainia nu kajerkam pujamna nusha iniaisatam?

⁵ Apatuk amatsuk tumá úttin amasuítme túram nea̱jik núkap áakratraitme.

⁶ Ayam matsatna nu áujmattsar wishikiainiak natsanmai̱ awajsarat tusam apujkartusume tura ii nemasri̱sha iin wishikramainiaji.

⁷ Nayaimpinmaya̱ Suntara Uuntri̱ Yusáa ataksha iin áwaṉkartukim. Ame shiir enentáiji̱a̱i̱ íikrattsam tsáapin awajkartusam uwemtikkiarturta.

⁸ Ejiptunmaya̱ uwa arakri̱ itiamame túram uunt nuṉka mátsatkamu armia nu ji̱i̱ra akupram uwa araamame.

⁹ Nuyá̱ nupa̱a̱ri̱sha ipianturmame túram kaṉkapé̱sha achimiar nuṉká piakmai.

¹⁰ Naint armia nunasha ni ejetari̱ji̱a̱i̱ nukukarmai tura Yusa sétruri̱ kanawe̱ ejakarmai.

¹¹ Ni kanawe̱sha tura jé̱e̱rmari̱sha nayantsa ímianai tsakainiak uunt entsa ímianai jeakarmai.

¹² ¿Urukamtai araka péṉkramuri̱sha sá̱a̱rkiniam? Warí túram ashí nuní̱ naṉkaamainia nusha úwan kupiniawai.

¹³ Nuyá̱ paki emesainiawai tura kampunniunmaya̱ yajasma yuíniawai.

¹⁴ Nayaimpinmaya̱ Suntara Uuntri̱ Yusá waitneasam waketkim nayaimpinmaya̱n waitnenkarturam jú̱ uwa árak wáinkiata.

¹⁵ Ame untsuur uwejmiji̱a̱i̱ árak je̱e̱r tsapait tusam araamam nuka ju̱i̱ti.

¹⁶ ¡Nusha tsupinkiarai tura ekemánkarai! ¡Túram Ame kakaram chicharmaja̱i̱ nisha kaji̱ṉ amuwainiawai!

¹⁷ Ame áishmaṉ anaikiam untsuur uwejmín apujsaitmena nu uwejrum awantsata. Nu aentsu uchirí̱ Áminiu takartusat tusam kakarmaram súsaitme.

¹⁸ Nuní̱ iisha Amiya̱ṉka kanakchartatji. Ame iincha iwiaakma amastatme túrawakmin Ame náaram pachisar untsuktatji.

¹⁹ Maa Jiuwáa Nayaimpinmaya̱ Suntara Uuntri̱ Yusá shiir enentáiji̱a̱i̱ íikrattsam áwaṉkartukim uwemtikkiarturta.