YKan. 76 - Yus Papí: Shuarja̱i̱ Yus Yamaram Chicham Najanamu

Ashammai Yus arantúktin

Ju̱ kanta kantamtikniun áatar súsaiti. Ju̱ kanta neturma ainia nuja̱i̱ tuntuiyatarum. Asap kantamámu.

¹ Jutanmaṉka Yuska paant nekaamuiti núnisaṉ Israernumka Ni náari̱nkia shiir uunt awajsamuiti.

² Ni Je̱e̱nka Saremnum pujawai tura Seun Ni pujutainti.

³ Nui̱ tíshimkiuja̱i̱ ekentai̱ naṉkincha tantarnasha puya̱ncha tura mesetnum mánitiai ainia núnaka mash kupiruiti. (Séraj)

⁴ Ámeka jíitsumpraitme kuntintri̱ntin naintia núja̱i̱sha naṉkaamas úuntaitme.

⁵ Áishmaṉ sapijmiachu arma nusha awakkar warirí̱ yarurkamu armai. Nú aishmaṉsha kaji̱nkiar kanararua núnis ajasármai. Tura áishmaṉ kakaram arma nuya̱sha chikichkisha ayamprumakcharmai.

⁶ Maa Jakupa Yusri̱yá Ame kakaram chicharkam mánitiai kárusha tura kawaisha nui̱ṉ naṉkantkar juákarmai.

⁷ Ámeka nekas ashammaintme. ¿Yaki Ame kajekakmincha paṉkái̱ iirmassha wajaint?

^8-9 Nuṉká péejchach matsatainia nu uwemtikran tura aṉkant awajsataj tusam Yusá sumamtikiataj timi juárkimiam nui̱ nayaimpinmaya̱n nekasa nuja̱i̱ métek sumamtikiatin antumtikiamame. Nui̱ nuṉká pujuinia nusha ashampramak mitia ajasármiayi. (Séraj)

¹⁰ Nekaska aentsu kajetáiri̱ṉkia Ámin shiir awajtámsattawai. Tura nu arant aents kajeki̱ wéamuri̱ṉkia Ame emettuattame.

¹¹ Nekas túrattajai tárumna nu Jiuwá atumí Yusri̱ umirkatarum. Ashí Ni pujamunam ayam matsatrumna nu Ashammai Yus ántar súsatin itiatárum.

¹² Úunt akupniu uchirí̱ ainia núnaka Ni amuktatui. Tura ju̱ nuṉkanmaya̱ úunt akupin ainia nui̱ṉkia Yuska ashamainti.