YKan. 75 - Yus Papí: Shuarja̱i̱ Yus Yamaram Chicham Najanamu

Sumamtikin Yus

Ju̱ kanta kantamtikniun áatar súsaiti. Nusha kanta “Emestukaip” tusar kantamámua nuja̱i̱ métek nakumsar kantamátniuiti. Ju̱sha Asap kantamámuiti.

¹ Ame náaram iin tíjiu̱ch pujá asamtai yumiṉkiaji Yusru, yumiṉkiaji. Ame aents túrachmin túraitmena nuna ashí áujmatainiawai.

² Yus chichaak “Wi ju̱i̱ṉ amukati títiataj nu tsawantiṉkia nekasa nuja̱i̱ métek sumamtikiawartatjai.

³ Nuṉkasha aents matsatainia núurtiuk meseakuisha Wiki nu pauri̱ncha achíakjai.(Séraj)

⁴ Náṉkamas enentáimin ainia nuna chicharkun ‘Naṉkamantu enentáimtumasairap’ núnisaṉ Yusan enentáimtichu ainia nuna ‘Atumek shiir awajmámsairap;

⁵ Tura atumí kakarmari̱ji̱a̱i̱sha naṉkamantu enentáimtumasairap núnisaṉ kuntujem ipiantasha ipiankaim chichasairap.’”

⁶ Nekas peṉké náakam awajnástai tákurkia etsa̱ jintiainmaani̱ya̱sha tura etsa̱ akatainmaani̱ya̱sha núnisaṉ kampuntin atsunumia̱sha winiatsui.

⁷ Antsu aya Yúsaiti sumamtikniuka. Chikichnaka péejchach awajeak chikichnaka páantin awajniuiti.

⁸ Sumamtiktai̱ piniṉkia Jiuwá uwejé̱n awai tura wíniuka karin eṉketámu wakapruá aya ajas awai. Ni Yus asa nuna ukartaj tusa aya awajás takakui. Nunasha ashí nuṉkanmaya̱ Nin enentáimtichu ainia nuka churunkiurtiuk umarartatui.

⁹ Tura wikia Áminiunka tuke etsertiatjai tura Jakupa Yusri̱n shiir awajkun kantamprittiajai.

¹⁰ Tunáa aents ainia nuna kakarmari̱nkia emestukartatjai antsu péṉkeran túrin ainia nuna kakarmari̱nkia nuna naṉkaamas awajnasartatui.