YKan. 74 - Yus Papí: Shuarja̱i̱ Yus Yamaram Chicham Najanamu

Yusa Je̱e̱ emesnakmatai utma

Asap kantamámu

¹ ¿Yusá urukamtai túkesha ajapa inikiartusum? Tura Ame sa̱a̱krumíya̱ murik árincha ¿urukamtai kajerkartukuitiam?

² Tí yaunchuk Wi shuar árat tusam wakerukam achikmamna nu enentáimturiá. Kame Wi shuar árat tusam sumakmame. Ame pujutái̱ram Seun naintcha enentáimturta.

³ Yaunchu emeskamu tuke írunna nuní̱ Ámeka wetá. Yus Shiir Awajtai̱ Je̱e̱n írunna núnaka ii nemasri̱ mash emeskaiti.

⁴ Yus Shiir Awajtai̱ Je̱a̱ Áminiua núnaka ajapéri̱n ame nemasrumka júrur ajainiawai tura nekanati tusar ni tarachrí̱ncha nenaawarai.

⁵ Kampuntin ténam jachaja̱i̱ awatua nútiksar ashí emeskar ikiukiármai.

⁶ Yamaikia jachaja̱i̱ núnisaṉ numi ajintiái̱ji̱a̱i̱ numiniam nakumkar najankamu ainia núnaka kupí kupí najankar ikiukiáru áiniawai.

⁷ Yus Shiir Awajtai̱ Je̱a̱ Áminiua núnaka jiji̱a̱i̱ ekemákarai. Túrawar Ame pujutái̱ram Ame náarmin apujsamua núnaka nuṉká emeskar mui̱jmiai̱ awajsarai.

⁸ Ni enentái̱ji̱a̱i̱ṉ chichainiak “Ju̱ chichamaik takamtsuk emeskartai” tuíniak ashí Yus enentáimtutai̱ṉkia jiji̱a̱i̱ áeskarai.

⁹ Yus iniakmamu yamaikia wáintsuji núnisaṉ Yúsnan etserniusha atsawai. Nu asamtai nekatash nékatsji ashí ju̱sha ¿urutmá tsawantak jú̱nissha pujusat?

¹⁰ Yusá ¿urutáik némasa nusha wishiknarat? ¿Kame némassha Ame náarminkia túkek katsekkin wétata?

¹¹ ¿Urukamtai untsuur uwejém émeteam túram urukamtai kunturam miniá miniakmamusmesh pujam?

¹² Túmaitkiuisha tí yaunchu Yuska winia úunt akupniuruyayi. Nuṉká matsatainia nuna uwemtikna nuka Níyaiti.

¹³ Ame kakarmarmiji̱a̱i̱ nayants jímiapetek tesamiame núnismek nayantsanmaya̱ yajasma muuke̱sha kupirkamame.

¹⁴ Riwiatán entsaya̱ uunt yajasma muuke̱sha ijiakturmame túram atsamunam matsamin yajasma ayurkamamame.

¹⁵ Ashintsasha tura entsasha jíintrarmai tura entsa ku̱yu̱achminiak kukach awajsarmame.

¹⁶ Núnisaṉ tsawantka Áminiuiti núnisaṉ káshisha Áminiukete. Amek etsa̱sha tura nantusha ikiusármame.

¹⁷ Ámeka nuṉka tesarnáiyamu ainia nuka tesarmame túram esatcha tura yumisha najankaitme.

¹⁸ Uunt Yusá, némas yajauch chichartamkana nu enentáimtusta. Tura aents enentáimcha ainia nuka Ame náarminkia nakitiáiniawai.

¹⁹ Kajen yajasma ainia nu Ame yampitsrumin máwarat tusam ni iwiaakmari̱ tsaṉkatkaip. Ashí kuítrincha Áminiu írunna nu tuke kajinmátkip.

²⁰ Tsuumai̱ matsamtai̱ nuṉká írunna nui̱ yajauch awajkartutai̱ji̱a̱i̱ tí piaku ásarmatai Ámiji̱a̱i̱ chícham najanamua nu enentáimturta.

²¹ Wáitkiasma matsatna nuka natsa̱a̱r waketkishti. Núnisaṉ atsumainia nuka tura kúntuts pujuinia nusha Ame náarmin shiir awajsarti.

²² Yusá yajauch awajtámainia nu iisam ayamprumakta. Aents enentáimcha ainia nuka ashí tsawant kajertamainia nu enentáimturarta.

²³ Ámin kajertamainia nuka tétete ajakiar tuke iniaitsuk charaatum ajakí̱ wena asamtai Ame nemasrum chichainia nu kajinmátkip.