YKan. 73 - Yus Papí: Shuarja̱i̱ Yus Yamaram Chicham Najanamu

Yajauch ainia nuna amukatniuri̱

Asap kantamámu

¹ Yuska Israerja̱i̱sha tura ashí péṉker enentáimin ainia núja̱i̱sha tí peṉkeraiti.

² Antsu wíji̱a̱i̱ṉkia nawer atajkinninkramai. Wi wekaaj tukamán atajkininkramjai.

³ Warí naṉkamantu enentáimtuma ainia nuna iisan tura Yusan enentáimtichu ainia nu kuítrintin ajakí̱ wénakui suir enentáimtusarmajai.

⁴ Kame najaimiar jákatniun enentáimiainiatsui antsu ni aya̱shi̱nkia kakaram péṉker áiniawai.

⁵ Aents kúntuts pujak wáittiain wáitiainiatsui. Chíkich aents urukainia núnis wáitsar pujuiniatsui.

⁶ Tura waantu enentáimtumatairi̱ṉkia ni nuṉkutairi̱nti tura ní yajauch awajkartutairi̱n pushí entsarua núnis nukuaku áiniawai.

⁷ Tí nuerar ni ji̱sha pusapsatin ajasárai. Tura ni enentái̱ji̱a̱i̱ ashí wainiainia núna naṉkaamas takustinian wakeruiniawai.

⁸ Chíkich ainia nunasha wishikiainiak tí waantu enentáimtumasar chichainiak yajauch awajsatniun chichaman juruiniawai.

⁹ Nayaimpiniam írunna nuna ni wene̱ja̱i̱ pachisar núnisaṉ ashí nuṉkanam írunna nunasha ni iniai̱ji̱a̱i̱ jiá pujuráiniawai.

¹⁰ Tuma asamtai Ni shuari̱ ainia nusha nu nuṉkanam wénawai tura entsaja̱i̱ métek ni chichame̱nka núkap úmuiniawai.

¹¹ Tura chichainiak “¿Yussha itiur nekaatiṉ tura Naṉkamantu Yuska nekatairi̱ takakuak?” tu chichainiawai.

¹² Maa, Yusan umircha ainia nuka tuke itit awajsachma pujuinia ásar ni kuítri̱n wárik ikiauntumainiawai.

¹³ Ti nekas peṉké antran winia enentái̱rnaka yajauch enentáimcha awajsaitjiai tura winia uwejrun nijiaran maṉkartichu ajasuitjiai.

¹⁴ Túrasha ashí tsawant káshik naṉkamar asutiámuitjiai.

¹⁵ Kame wi chichaakun ni chichainia núnisnak chichastájai tíniuitkiunka nekaata ame uchirmin anaṉkawaraintjiai.

¹⁶ Ju̱na nekaataj tusan enentáimsataj tukamán tí itiurchatauyi.

¹⁷ Yus Shiir Awajtai̱ Je̱e̱n waya̱maj nui̱ ukunam túrunawartatna nuna nekaamjai.

¹⁸ Ti nekas tameṉmánum iniarminium apujsarume túram emeskamunam ajapawarume.

¹⁹ ¡Aya aneachmanum jú̱nik juákaru áiniawai! Tura tí sapijmiakaru ajasár amukaru armai.

²⁰ Mesekramu tepá shintiá núnisam Uuntá, nantaktiatmena nuiṉkia nu shuar péṉker matsatáiniakuisha iisam peṉké antraiti tu enentáimturtatme.

²¹ Ti nekas winia wakantrui̱ tí kuntuts enentáimkiun wáitsan pujumjai tura winia enentái̱rui̱ ji̱i̱riarmai.

²² Wikia enentáimchauyajai tuma asan nekaatniun jeachuyajai. Warí Ame íimmianumka wikia yajasma núniniauyajai.

²³ Túmaitiatnak tuke Ámiji̱a̱i̱ wikia pujumjai tura winia untsuurui̱ni̱ achirkámame.

²⁴ Chichartasúam jurukmiame túram ukunam ame tsáapnintrumi̱i̱n péṉker apujtustatme.

²⁵ Nayaimpinmaṉka aya Áminiak takakjame. Núnisaṉ ju̱ nuṉkaya̱nka Amiya̱ṉka chikichnaka peṉké atsumatsjai.

²⁶ Winia aya̱shruka tura winia enentái̱rsha jakamnia nekapenawai. Antsu winia uunt kayarua núniska tura winia puukma tuke átinia nuka Yúsaiti.

²⁷ Maa, Amiiya̱ kanainia nuka amuukartatui. Warí, Ámin ikiurmainia nuka Ame emesrartatme.

²⁸ Antsu wikia Yusai̱ tíjiu̱ch pujakun tí peṉker pujajai. Tuma asan Ashí Uuntri̱ Uunt Yusai̱ péṉker átinian nákakun Ame túramunka áujmatjai.