YKan. 71 - Yus Papí: Shuarja̱i̱ Yus Yamaram Chicham Najanamu

Tsawantan émtuku ainia nu Yus seamu

¹ Jiuwaá Amiin ayamprutkai tusan e̱a̱jme. Tuma asamtai wíniaka natsa̱a̱rat tusam peṉké tsaṉkamprukaip.

² Ame nekasa nuja̱i̱ métek túrutairmiji̱a̱i̱ yaintkiam aṉkant awajtusta. Tura winia anturtukam uwemtikrurta.

³ Ámeka wi tui̱ tuke ejamniuitiaj nu muchiṉkruitme. Warí Ame uwemprati tusar akupkámuja̱i̱ uwempraitjiai tura Ámeka winia ikiakátniuitme tura muchiṉkruitme.

⁴ Winia Yusru Yusan enentáimtichu tura tí yajauch ainia nuyá̱ tura waitnenkartichu ainia nuna kakarmari̱ya̱sha aṉkant awajtusta.

⁵ Maa Uunt Jiuwá Ámeka winia nákamuruitme. Wikia natsa ámiaj ímianiaṉ Aminiak enentáimtusan wekaasaitjiai.

⁶ Wi akiiniamiaj ímianiaṉ Ámeka winia emetruamiame. Winia nukuru initri̱ya̱ṉ jurusmamna nuka Ámetme. Tuma asan wikia Áminkia tuke shiir awajtiatjame.

⁷ Untsurí aents winia íirsar ¡ausha itiur iwiaakua! turutainiawai túrasha Ámeka wi ejamtai̱r tí kakarmaitme.

⁸ Ámin shiir awajsatin winia wenuruí̱ṉkia piaktí núnisnak tsawant takamtsuk Ame páantniurmin etserkatjai.

⁹ Weampramtaisha ajapa iniaitiusaip. Kakarmachu nekapeakuisha ajapa ikiurkip.

^10-11 Warí winia nemasur tura winia mantuataj turutainia nuka nuamtak chichasar chichartuiniak “Yuska ajapa iniaisaiti. Yaki uwemtikrat patatukar achiktai” turutainiawai.

¹² ¡Yusá wini̱ya̱ṉka kanakipia. Antsu winia yaintkiataj tusam Yusru wárik taruttia!

¹³ Winia nemasur ainia nuka natsan ajak amukarti. Winia yajauch awajtústaj turutainia nuka páchim enentáimtikrarta túram natsanmai̱ ajakarti.

¹⁴ Antsu wikia Ámin nekas enentáimtusan tuke nákastatjai túran Áminkia nú arant shiir awajkin wétatjame.

¹⁵ Nekasa nuja̱i̱ métek Ame túriniaitmena nuna tura uwemtikkiartiniaitme nunasha winia wenurka etserattawai. Kame nusha nekapmarar anairachmin ának tsawant takamtsuk etserkattajai.

¹⁶ Uunt Jiuwá kakarmari̱ji̱a̱i̱ najankamu ainia nuna áujmatsattajai tura nekasa nuja̱i̱ métek túriniaitmena nuna aya Áminiunak etserkattajai.

¹⁷ Yusá wikia natsa ai̱ṉ Ámeka unuitiurmiame tura yamaiya̱ ímiaja̱i̱sha aents túrachmin najanaitmena núnaka etserkin wéajai.

¹⁸ Weampran jemperuran pujakuisha Yusru, Ame kakarmarminkia yamái akiiniainia nunasha tura ukunam matsamiartatna nunasha ujaamam ajapa iniaitiusaip.

¹⁹ Maa Yusá nekasa nuja̱i̱ métek túriniaitmena nuka nayaimpiniam jeawai. Yusá Ámeka warí warinkish ti uunt najankaitme ¿Ámiji̱a̱i̱ méteksha yaki aa?

²⁰ Ámeka jakamnia nekapratniusha núnisaṉ yajauch wáinkiatniusha iniaktursaitme. Túrasha ataksha iwiaakmarka awaṉturkim nuṉká initri̱ya̱ iniantuktiatme.

²¹ Túrasha Ámeka nu páantin awajtústatme túram ataksha atsaṉturtatme.

²² Winia Yusru chichakmaram ímiatrusmek umin asaakmin tuntuitiai̱ neturmaja̱i̱ shiir awajsattajme. Tunaari̱ncha Israera Yusri̱yá árpaja̱i̱sha Ame nekasaitmena nuna kantampruáttajme.

²³ Wi kantan kantamkui Winia wenurka warastatui. Warí winia uwemtikruruitme.

²⁴ Winia yajauch awajtústaj tiarma nuka waakar natsanmai̱ ajakaru ásarmatai wikia tsawant takamtsuk nekasa nuja̱i̱ métek túrutairmea nuna etserkattajai.