YKan. 7 - Yus Papí: Shuarja̱i̱ Yus Yamaram Chicham Najanamu

Yajauch aentsua nuyá̱ ji̱i̱rkit tusar Yus seamu

Kus Piṉjiamín shuar tiniu asamtai ju̱ kántaka Tawit áaruiti.

¹ Maa Uunt Yus winia Yusru, Amiin ú̱mkajai. Tuma asamtai winia pataaturainia nuyá̱ uwemtikruram aṉkant awajtusta.

² Ayamprúktin atsakui úunt ya̱wa̱ warí itiurniuit nútikrua winia wakantrun aents yajauch awajtúsar ayampruttsuk ikiurkiara̱i̱ṉ.

³ Uunt Yus winia Yusru, ju̱nasha túrawaruitkiuiṉkia tura yajauchia nunasha túraitkiuiṉkia,

⁴ wiji̱a̱i̱ péṉker pujan yajauchí yapajkiaitkiuiṉkia tura winia nemasur áiniancha peṉké ántranak atantraruitkiuiṉkia,

⁵ antsu nuiṉkia winia nemasur ainia nuka winia wakantrun pataatuk amayá̱ṉ winia iwiaakmarnaka nuṉká najarar winia péṉker náarnaka peṉké ántar awajsarti. (Séraj)

⁶ Uunt Yusá suir enentáimkium ayamprutkata. Winia wáitkiarainia nuna kajetáiri̱ wáitkiam winia waitnentrakum sumamtikiawarta.

⁷ Aents iruntraru téntatmakartatui túrunamtai Ámeka nui̱ uuntri̱ ajasam pujusta.

⁸ Uunt Yus aents iruntrarunka sumamtikiattawai. Maa Uunt Yusá wi péṉker túriniaitjiana tura wi urukuitiaj nuja̱i̱ métek wíniaka sumamtikruata.

⁹ Yusan enentáimtichu ainia nuna yajauchiri̱nkia amukati tura péṉker túrin ainia nuka péṉker wáinkiata. Yuska péṉkeran túrin asa aentsu enentáincha tura enentáimmiancha nekapas iyawai.

¹⁰ Winia tantaruka Yúsaiti tura naka enentáimin ainia nuna uwemtikniuiti.

¹¹ Péṉkeran túrin ainia nuna ayamprinkia Yúsaiti. Yajauchin túruinia nuna Yus tuke tsawant kajerawai.

¹² Tura Yusan enentáimtichu nekas enentáiji̱a̱i̱ enentáimsar tunaari̱n iniayachkuiṉkia Uunt Yus puya̱ri̱n atsaktawai tura Ni tíshimkiuri̱n iwiar aya awajás pujurui.

¹³ Núnisaṉ mánaikiar jatain Níniunak tura naṉkirí̱ncha kean iwiar takakui.

¹⁴ Iisiá Yusan enentáimtichu yajauchiri̱ji̱a̱i̱ enentáimias íwiareawai tura yajauchin ajaprukmatai nuya̱ṉka wait akiiniawai.

¹⁵ Wa̱a̱n ti init tá̱i̱wiarai túrawar ni wa̱a̱ tá̱i̱miunmaṉ iniawarai.

¹⁶ Ni yajauch túramuri̱ ti takakmasma nuke muukem aju̱a̱rartatui tura tí yajauch túrutai̱ṉ muuknumaani̱ iniantrattawai.

¹⁷ Tura Yusa túrutairi̱ṉkia péṉker asamtai wi Uunt Yusan yumiṉsan shiir awajsattajai túran Uunt Yusa naari̱ Ashí Naṉkamantu asamtai kantampruáttajai.