YKan. 68 - Yus Papí: Shuarja̱i̱ Yus Yamaram Chicham Najanamu

Nupetmaktai tusar Israer shuar wénamu

Tawit kantamámu

¹ Yus wantinkiattawai túrunamtai nemasri̱nkia tsakiṉmakartatui. Tura kajerainia nuka Niya̱ pisakártatui.

² Ántsaṉ Ámin enentáimturmachu shuar ainia nuka mukuint aya meṉkaana tura mikia jinium kuar amuwana nútiksam amukártatme.

³ Antsu Yusan enentáimtin ainia nuka warasar Yusja̱i̱ shiir pujusár ti warainiak nanten nanten ajartatui.

⁴ Wats átumka Uunt Yusa naari̱ pachisrum kantampruátarum. Yuraṉminiam eketkana nuna jinti̱ iwiarturtarum. Úunt Yusaiti Ni náari̱ṉkia. ¡Tikishmatrarum shiir awajsatarum!

⁵ Uunt Yuska Ní tunaarincha pujutái̱ri̱n pujayat mitiaik ainia nuna aparí̱nti tura waje̱ncha ayampri̱niaiti.

⁶ Shuar niṉki pujancha tsaniṉkia pujustintri̱n súwiti, aṉkantcha pujuiniancha aṉkant awajás péṉkernum matsawiti. Antsu umichu ainia nuka yajauchiniam matsatainiawai.

⁷ Yusá, Amé shuar kampuntin atsú nuṉkanam yaruaka wéakmin

⁸ nuṉka ú̱u̱rkamiayi.(Séraj) Kame Israer shuara Yusri̱ nayaimpinmaya̱ yumincha akupkámiayi tura ímia Senái naintcha Ni íimmianum muchitkiamiayi.

⁹ Yusá, Ámeka nuṉka ajampram péṉker awajsattsam núkap yútumtikiamiame.

¹⁰ Yusá, Amé shuarum nui̱ pujuarmia nu ame waitnenkartutairmiji̱a̱i̱ atsumainiak wáitnenmai ajainiakui súsarmiame.

¹¹ Etserkatniunka Uunt Yus akatrarmiayi. Nu etserkamun untsurí nuwa̱ jú̱nis ujakármiayi,

¹² “¡Iisiana, suntara úunt akupniuri̱ nupetkaram pisarainiawai!” Tura utsaṉka ikiukiarmanka nuwa̱ je̱á̱ pujuinia nu akantúnainiawai.

¹³ Átumka ajapamua áintsarum pujarmin awakmaku awajsam yamaikia yampitsa nanape̱ wincharpátniuja̱i̱ tura ni ure̱sha kurí peṉkeri̱ji̱a̱i̱ ukatkámua núnis awajsámuitrume.

¹⁴ Ashí Tujintkiachu Yus úunt akupniun ipiskarmia nui̱ṉkia Sarmun náintniaka micha amuamiayi.

¹⁵ Pasan naintkia Yusa náintri̱nti. Nuka tí yaki̱ya̱iti.

¹⁶ Chíkich náintiram tí yakí̱ árum nusha ¿urukamtai Yusa naintri̱ suirsha iyarum. Warí Yus ni náintri̱n pujustinian wakera asa tuke nui̱ pujuschattawak?

¹⁷ Uunt Yuska Senainmaya̱ jiinkí̱ ni káruri̱ nekapmarar peṉké amukchamniaja̱i̱ Yus Shiir Awajtai̱ Je̱e̱n winiawai.

¹⁸ Ámeka achirma ainia nu yaruakam wakamame. Tura aentsu warirí̱sha takurkame. Nu arant umichusha nakitiáiniak akikmamtikiamame. Nui̱ shiir pujustaj tusam túramame.

¹⁹ Ii uwemtikramin Uunt Yus ashí tsawantin ii itiurchatri̱n yaintma asakrin ¡Aya Ni náari̱ṉᵏⁱ shiir awajnásti! taji. (Séraj)

²⁰ Kame ii Uunt Yusri̱ṉkia uwemtikkiartin Yúsaiti. Tuma asa jákatniunmaya̱ uwemtikramniaiti.

²¹ Yus ni nemasri̱n waantu enentáimias tunaan túruki̱ wena nú shuarnaka muuknum awatiar nekas nupetkartatui.

²² Uunt Yus chichaak “Pasannumia̱sha tura uunt nayantsa initiari̱ya̱sha jusan awaiṉki̱ ikiankattajrume.

²³ Warí nemasmi numpe̱ja̱i̱ nawemin numpamnattame. Tura ame ya̱wa̱i̱misha numpan nukarartatui” tímiayi.

²⁴ ¡Nuá Yus nupetmatkam wininia nu iiskua! Yus Shiir Awajtai̱ Je̱e̱n wararainiak wekainia nu winia akuptin Yúsrunu áiniawai.

²⁵ Kantamniuka eem wénakui nuwa̱ natsachikia shakapa takaru ajapén wenai̱ tuntuiniuka uku wénawai.

²⁶ Átum Israer shuara uchirí̱tiram ashí iruntramunam Uunt Yusa naari̱ shiir awajsatarum.

²⁷ Wats iistarum, uchich írutka Piṉjiamín wea eem wénakui, Jutá uuntri̱ ni írutramuri̱ji̱a̱i̱ nuyá̱ Sapurún tura Neptarí úuntri̱nkia uku wénawai.

²⁸ Ame Yúsrum yáintmak ikiakátmarmai. ¡Maa Yusá, nekas túraitjiarme tukartitia!

²⁹ Jerusaréṉnum Ame Uunt Je̱e̱m péṉker atí tusar úunt akupin níniua nuna ántar amastaj tusa itiartámartatui.

³⁰ Yajasma tsuatnum matsamsar nuyá̱ waaka uchich ainia núninia nuka chicharkarta. Tura aents aya kuítniak enentáimtuiniana nuka itit awajkarta. Núnisaṉ aents aya mésetnak wararainia nusha tsakiṉmakarta.

³¹ Ejiptunmaya̱ peṉkeri̱ táartatui tura Itiupíanmaya̱ṉka shiir awajainiak uwejé̱n Yusan takuriartatui.

³² Tuma asamtai ashí nuṉkanmaya̱ úunt akupin pujarmena nútiram Uunt Yus kantampruátarum. (Séraj)

³³ Nayaimpiniam ashí naṉkamantu tuke pujuwa nu kantampruátarum. Nisha ti kakaram chichaktatui.

³⁴ ¡Yusa naṉkamanturi̱ nekaatarum! Niṉkia Israer shuarnum ni páantniuri̱ atí tura nayaimpinmasha ni kakarmari̱ atí.

³⁵ Yusá, Ámeka ame náaram Shiir Awajtai̱ Je̱a̱nmaya̱ṉ ti ashammaintme. Israer shuara Yusri̱nkia ní shuari̱n ikiakár kakaram ajastinian suawai. Tuma asamtai ni naari̱ shiir awajsamu atí.