YKan. 66 - Yus Papí: Shuarja̱i̱ Yus Yamaram Chicham Najanamu

Yus Ni najankamuri̱ji̱a̱i̱ shiir awajsata

Jú̱ kantan kantamtikniun áatar súsaiti.

¹ Ashí nuṉkanam matsatrumna nútirmeka warasrum Yus untsuktarum.

² Ni Naari̱ naṉkamantu náakam asamtai kantampruátarum. Túrarum Ni páantniuri̱ shiir awajsatarum.

³ Yus chicharkum “¡Ame najankamurmeka ii ajamai áiniawai. ¡Tura Ame kakarmarmeka timiá uunt asamtai nemasrumka ashampramak umirtamu ajainiawai!” titiarum.

⁴ Ashí nuṉka matsatainia nu Amincha tikishmátramprartatui. Núnisaṉ Ámin shiir awajtámainiak kantamprútmawartatui. Ame Náarmin úuntaiti tusa nisha kantamprútmawartatui. (Séraj)

⁵ ¡Yus najankamu winirum iitiarum! ¡Ni aents yáiṉtaj tusar najankamuka ii ajamainti!

⁶ Ni nayantsan akanák núṉkak kukach awajsámiayi. Tura entsa wekaasar jiniatsuk katia̱rarmiayi. Ni nui̱ túramuri̱ji̱a̱i̱ wararsartai.

⁷ Ni kakarmari̱ji̱a̱i̱ tuke akupniuiti. Uunt nuṉka mátsatkamu ainia nunasha Ni iyawai. Yusan umirkatniun nakitín ainia nuka Yusja̱i̱ wajatnairataj tu enentáimsacharti.(Séraj)

⁸ ¡Ashí aentstiram ii Yusri̱ shiir awajkuram chichammiji̱a̱i̱ ántumtikiatarum!

⁹ Iwiaaku apujtamas wáitmajnia nuka Níyaiti tura ii nawé̱ atajkintra̱i̱ tusa wáitmaji.

¹⁰ Warí, Ame Yusá iin nekapkartusume tura winchá jiru unuikiar imiatkincha awajsamua nútikiartuame.

¹¹ Túram nekanam eṉkekratkame túram ii tuntupén kijin awaṉtkartukume.

¹² Ii nemasri̱ kawainium eketka muuknum najarkutak naṉkakartukit tusam tsaṉkatkarmame. Tura jiniumaṉ ántsaṉ entsa tsuumainiumaṉ naṉkamakmiaji. Nu naṉkarakrin peṉké atsumachminnium apujkartusmame.

¹³ Ame Je̱e̱minkia taṉkun takamtsuk aestuataj tusan itiattajai. Tí nekas túrattajai tímiaj núnaka umiktatjai.

¹⁴ Warí, wi wáittsan pujumaj nui̱ wi chichakmaj núnaka umiktatjai.

¹⁵ Taṉku jaerman takamtsuk aestuan murik áishmaṉka mukuintiuri̱n akuptúktatjame. Tura waaka nuyá̱ chipiu áishmaṉkan aestuatniun itiartitiajme. (Séraj)

¹⁶ Ashí Yus arantak umirin árumna nútiram winirum antuitiarum túrawakrumniṉkia winia iwiaakmarja̱i̱ túrama nuna ashí ujaktatjarme.

¹⁷ Winia wenurja̱i̱ yaintkiat tusan Nin untsukmajai túran chichampruja̱i̱ shiir awajsámjai.

¹⁸ Wi enentái̱rja̱i̱ṉkia tunaan aneayatnak Yusan áujsaitkiuiṉkia Uunt wíniaka anturtukcha̱a̱yi.

¹⁹ Antsu wi yáintkiata tusan seamaj núnaka Yus ti nekas wíniaka anturtukmai.

²⁰ ¡Wi seamuncha tura Ni waitnenkartutairi̱ncha winia suritrukcha asa Yus shiir awajsamu atí!