YKan. 65 - Yus Papí: Shuarja̱i̱ Yus Yamaram Chicham Najanamu

Yus waitnenkartak shiir iniakmamu

Jú̱ kantan Tawit kantamtikniun áatar súsaiti.

¹ Maa Yusá, Seúnnum Ameketme shiir awajmáinmeka tuma asamtai ju̱na túrattajai tiarka umirtamkartiniaiti.

² Warí, seamusha Ámeka ántame tuma asaakmin ashí iwiaaku ainia nuka aya Aminiak e̱a̱tmakartatui.

³ Winia tunaaruk itit awajtak nupettuktasa wakerawai túrasha winia umishtairsha Ámeka tsaṉkurtame.

⁴ Aents Ame je̱e̱min pujusat tusar Ame achikma Aminí̱ weamkaka ti shiir awajsamuiti. Yúsnan akantúkma Uunt Je̱e̱n tí peṉker írunna nui̱ apujsar nútsumtikrar waramtiksamu ártatui.

⁵ Ashí nuṉka náṉkatramunam matsatáinia nú tura ti arant nayantsanam pujuinia nusha péṉker átinian Ámin nákarmainiawai. Uwemtikkiartin Yusá Ame nekasa nuja̱i̱ métek péṉker túrutairmiji̱a̱i̱ nekaachmin ainia nú túrakum iinkia iniaikiartusuitme.

⁶ Ámeka kakaram asam Ame kakarmarmiji̱a̱i̱ naintcha najankam apujram umuchrachmin awajraitme.

⁷ Tura nayants úu ajak tampari̱ téter ajakuisha núnisaṉ nuṉkanmaya̱ aents charaatum ajainiakuisha Amek mitia awajniuitme.

⁸ Tuma asamtai nuṉka náṉkatramunam ashí aents matsatáinia nuka Ame túrutairam nekaachmin áiniana nuna ti ashamainiawai. Tsawantcha tsawa̱a̱kui tura kí̱akui̱sha Amek tí peṉker enentáimtiksam ti shiir warasmaja̱i̱ kantamtikiainiame.

⁹ Nuṉkasha wekaatusa iisam yumi yutumtikiam entsa ukatme túram tí peṉker awajsam shiir neremtikme. Yusa entsarí̱ piak awai. Túram Ame wakerakum yumi akuptúkam tríkiusha ti péṉker neremtikiainiame.

¹⁰ Kame táukmari̱sha jampemtikme túram táurmanumaani̱ entsa akupeame tura yumi yutumtikiam miniarmatai shiir tsapamtikme.

¹¹ Ashí uwisha Ame waitnenkartutairmiji̱a̱i̱ tí nukap amaame tura Ame sukartamna nusha tí nukap pímiawai.

¹² Tura kampuntin atsunum yumi yútakui sa̱a̱ksha tsapawai túmakui̱ naint ayantántu áiniana nuka shiir warainiawai.

¹³ Sá̱a̱kniumka murik enetak írunui tura pakanmaṉka yurumak nerekáru írunui. Warí tí warainiak charaatum ajainiak kantamáiniawai.