YKan. 63 - Yus Papí: Shuarja̱i̱ Yus Yamaram Chicham Najanamu

Aents Yusan kitiamakui seatin

Tawit kantamámu

¹ Maa Yusá, Ámeka winia Yúsruitme ju̱cha enentáimpran e̱a̱jme winia wakantruka Áminiun kitiamawai. Nuṉka ju̱ju̱ptin entsa atsunum winia aya̱shur kitiamak wakerutmawai.

² Yus Shiir Awajtai̱ Je̱e̱min ame kakarmarmincha tura ame wincharumin wainkiajai.

³ Kame ame waitnenkartutairmeka iwiaakmaja̱i̱sha naṉkaamas péṉkeraiti, tuma asakmin winia wenurja̱i̱ shiir awajsattajme.

⁴ Tura wi iwiaakjana ju̱i̱ṉkia shiir awajtiatjame, tura ame náarmin pachisan uwejrun takurtiatjame.

⁵ Yurumkan tí peṉkeran yuruma ti shiir enentáimtsuk núnisnak wisha nekaprattajai. Tura winia wenurja̱i̱ shiir awajkun kantampruáttajme.

⁶ Kame wikia Ámin enentáimtakun peakruí̱ tepesan jintia iistá tusar awasamu áintsaṉ shintiaran enentáimtu teperjame.

⁷ Warí, Ámeka winia yáinniuitme, tuma asam atash uchichíri̱n wear etektus pujurna áitkiasam ejatkam apujtusakmin warasan kantampruáttajme.

⁸ Wikia iwiaaku pujajna ju̱i̱ṉkia Ámiji̱a̱i̱ tsaníakui ame untsuur uwejmiji̱a̱i̱ achirkattame.

⁹ Kame winia mantuataj turutainia nuka jakaa matsamtai̱niam akupkarta.

¹⁰ Puya̱ja̱i̱ mantamna amuukarti túrunamtai ni aya̱shi̱nkia rúpu ya̱wá̱ yukartin yuá amukarti.

¹¹ Tura úunt akupniuka Yusai̱ warastatui. Yus íirmanum tajai tuinia nuka warasartatui tura wáitrin ainia nuka wené̱ epetkamu ártatui.