YKan. 61 - Yus Papí: Shuarja̱i̱ Yus Yamaram Chicham Najanamu

Péṉker waitkiat tusar Yus nákamu

Tawit kantamámu

¹ Maa Yusá yainkiai tusan untsumjana nu antukta tura wi seajme nuka umirtukta.

² Nuṉka tsukintri̱ náṉkatrana tímianian mayai̱r ishinkiuinkia Ámin untsuktatjame. Kaya ti yaki̱ya ímianunam juruktia.

³ Ámeka winia ejamtairuitme, je̱a̱ kayaja̱i̱ je̱a̱mmia winia nemasruinia̱ ejatna núnisaitme.

⁴ Wikia Ame je̱e̱min tuke pujustajtsan wakerajai, kame atash uchichíri̱n wéar nanape̱ja̱i̱ etektus pujurna áitkiasam ú̱rkata. (Séraj)

⁵ Maa Yusá, wi amastájai tímiajmena nu anturtukmame. Ame náarmin ashamainia nu ii aparí̱niu sunastinia nu surusuitme.

⁶ Uunt akupniu tsawantri̱nkia núkap eketkata, ni uwiri̱sha yamaisha tura ukunma ímianaisha tuke átatui.

⁷ Yusai̱nkia tuke akuptiatui Ni aneṉkrattairi̱ji̱a̱i̱ métek wainkiattawai.

⁸ Tuke tsawant ame náarmin pachisan kantamprittiajme tímiajmena núnaka tuke umiktatjai.