YKan. 58 - Yus Papí: Shuarja̱i̱ Yus Yamaram Chicham Najanamu

Nuṉkaya̱n sumamtikin Yúsaiti

Ju̱ yamaram kanta kantamtikniun áatar súsaiti. Nusha kanta “Emestukaip” tusar kantamámua nuja̱i̱ métek nakumsar kantamátniuiti. Jú̱naka Tawit áaruiti.

¹ Sumamtikin árumna nútirmesha maa, nekasa núja̱i̱ṉ ¿súmamtikrum? Aentsu uchirí̱tirmesha, nákakea núja̱i̱ṉ ¿súmamtikrum?

² Atsá antsu yajauch enentái̱ji̱a̱i̱ túrarme. Tura átumka netse túrutai̱ji̱a̱i̱ ju̱ nuṉka yajauch awajrume.

³ Yusan umircha ainia nuka nukurí̱ya̱ṉ Yusai̱ya̱ kanakiáru áiniawai tura akiiniawarma nuya̱ṉ waakar wáitrin ajainiawai.

⁴ Ni chichame̱nka napí tséasri̱ya núnis áiniawai. Tura nisha napí ántayat ántachu ajana núnin áiniawai.

⁵ Tura nú aentska kajen napin nawamkatniun ti unuimiátra piṉkiuí umpunmasha ántachu ajana núnin áiniawai.

⁶ Yusá umirtamcha nai̱ kupirarta. Jiuwáa, úunt ya̱wa̱ riún uchirí̱ya núnin ainia nuna wajiṉkí̱sha kupirarta.

⁷ Nisha entsa nuṉká ukaram akar aya méṉkana núnikti. Ni naṉkiri̱sha kupí kupinia ajattsarti.

⁸ Yusan umircha ainia nuka tsuntsu maintri̱ amukámtai jaka tsai̱nia núnik amukarti! Ántsaṉ uchi jaka ishimkímiu tsáapninian wáintsuna núnisaṉ nisha wáinkiacharti!

⁹ Atumí ichiṉnari̱ jaṉki tsutsutram keek utsuweachunak nase umpuí netse ainia nuka aya emeṉkákma ártatui!

¹⁰ Péṉker enentáimkia nuka yapajmiátkam nekáa warastatui tura Yusan enentáimtichua nuna numpe̱n naweja̱i̱ amuturtatui.

¹¹ Nuiṉkia aents chichaak “Ti nekas péṉker túrin ainia núnaka ni túramuri̱ji̱a̱i̱ métek akikiártatui. Tura nekas Yus ju̱ nuṉkanam métek sumamtikiui” tiártatui.