YKan. 50 - Yus Papí: Shuarja̱i̱ Yus Yamaram Chicham Najanamu

Yus aentsun sumamtikiawartatui

Asap kantamámu

¹ Najankamu yus ainia nuna Uunt Yusri̱ Yus chichakuiti tura etsa̱ jiini̱ akaana ímianai pujuinia nuyá̱ aentsun irur ujakáruiti.

² Seúnnumia̱n Yus tsáapin ajasmiayi, shíirmach pepru tí peṉker asamtai.

³ Kame ii Yusri̱ winiak tákamtak winishtatui, ji áeskartua amukar tuke winiana tura kakaram naseja̱i̱ winitniuiti.

⁴ Nayaimpinmaya̱ncha tura nuṉka pujuinia nunasha ujawai tura niniu ainia nuna sumamtikiawartatui.

⁵ Winia árumna nu iruntratarum núnisaṉ wiji̱a̱i̱ chichaman najanawar ni aya̱shi̱n íktursarma nútiram iruntratarum.

⁶ Yuska sumamtikniuiti, tuma asamtai nayaimpikia Yusa péṉkeri̱n paant awajtawai. (Séraj)

⁷ Tuma asamtai chichastatjai, Israerá antukta, atumín paant ujaktatjarme. Wikia atumí Yusri̱ntji̱a̱i̱ Úunt Yusaitjiana nuitjiai.

⁸ Atumí taṉkuri̱ tuke tsawant áestureakmeka núnisaṉ atumí taṉkuri̱ takamtsuk surarmena nuja̱i̱ tátsujrume.

⁹ Atumí waakari̱ áishmaṉchincha achikchattajai núnisnak chipiu áishmaṉkach wenuknum eṉketna nunasha seatsjarme.

¹⁰ Tura ashí yajasma kampunniunmaya̱ ainia nuka winia áiniawai núnisaṉ yajasma nekapmarchamnia naint irunainiawai.

¹¹ Núnisnak nanamtin naint irunainiana nunasha nékajai tura kampunniunam yajasma muchitiainia nuka Wíniaiti.

¹² Kame wi tsukamaknaka áminkia amaschaintjiame. Warí núṉkaka Wíniaiti, kame nuṉká írunna nuka ashí winia áiniawai.

¹³ ¿Kame Wi waaka namaṉke̱n yuámniakaitiaj núnisnak chipiu numpe̱ncha umarminkiaitiaj?

¹⁴ Antsu namaṉ aesam súamna núnisam Yus yumiṉsam shiir awajsata. Núnisam imiá Naṉkamantu Yus anajmatramna nu nekas umirkam susata.

¹⁵ Itiurchat pujakum untsurkata. Túrutawakminkia uwemtikrattajme. Tura ámeka shiir awajtústatme.

¹⁶ Túrasha Yuska yajauch aentsun jú̱nis chicharui “¿Wi akupkámusha warí amesha íistiniaitiam tura Wi aentsja̱i̱ chícham najanamusha warí amesha áujmatsatniuitiam?

¹⁷ Kame Wikia jintintiátniun wakerimjiame túramaitiatam winia chichamur anturtsuk nakitniuitme. Kame ámeka jintintiataj támaitiatam peṉké anturtatsme.

¹⁸ Tura kasasha shiir awajeame tura enentáimtiniaitme. Núnismek tsanirma ainia núja̱i̱sha iruneame.

¹⁹ Nuyá̱ wenumji̱a̱i̱ tura iniaimiji̱a̱i̱ṉkia wáitriniaitme.

²⁰ Tura pujusam ame írutramuram áujmatme núnismek ame yatsuchirmek kajerame.

²¹ Kame ashí jú̱ túrashtin túramame túrasha wikia pachischamjame. Tura ámeka wiya núniniaiti turutmiashum. Túrasha yamaikia nekak tusan chichareakun paant iniaktustatjame” tawai.

²² Yúsnan kajinmatainia nútiram antuktarum núja̱i̱nchuka tsai̱ tsai̱ awajtámsamniaiti. Túrutmamtai yaki uwemtikramprat.

²³ Winia kuṉkuinian áestureana núnis nekas enentáimias kantamprútaṉka shiir awajtawai. Tura shuar eseer wekaakka nin Yusai̱ uwemtikramun paant iniaktustatjai.