YKan. 5 - Yus Papí: Shuarja̱i̱ Yus Yamaram Chicham Najanamu

Itiurchatnumia̱ aṉkant awajtúsat tusa seamu

Tawit kantamámu

¹ Uunt Yusá winia chichamur anturtukta. Tura winia wáitiamurun enentáimsan seajmena nu waitnentrurta.

² Kame winia Úunt Akupin Yusru wi seajmena nu péṉker anturtukta.

³ Maa Uunt Yusá wi káshik seamu anturtuktatme. Kame káshik sean ai̱rkai tusan nákastatjame.

⁴ Warí Ámeka yajauchin wararin Yúschaitme. Amiinkia yajauch ainia nuka peṉké pujuschartatui.

⁵ Núnisaṉ naṉkamantu enentáimtuma ainia nuka Amiiṉkia jeashtin áiniawai. Warí ashí yajauchi túrin ainia nuka peṉké mui̱jiainiame.

⁶ Nútiksamek wáitrin ainia nuka amuktatme. Kame Uunt Yus aents maṉkartinniaka tura anaṉkartinniasha muí̱jiainiawai.

⁷ Túrasha Yusru tí naṉkaamas waitnentra asakmin wikia Ame ti shiir Je̱e̱miin waya̱n tikishmátrattajme.

⁸ Uunt Yusru winia nemasur itiurchat awajtuiniakui péṉker túratin jintintruata. Túram péṉker jintianam juruktia.

⁹ Warí niṉkia anaṉkartin ásar nekascha nuna chichainiawai. Tura péṉker enentáimtursarat tusar shiir chichaman ántar chichainiawai. Kame ni chichame̱nka iwiarsamu ashiimiua núnis ti yajauch tsuumainti.

¹⁰ Yusá nú aentska makuaram asutiáwarta. Ni yajauch enentáimtairi̱ni̱ṉ sumamawarti. Warí amincha kajertamkar ti yajauchin túruiniak ame akupkámurmin umikcharmiayi. Tuma asamtai Amiiya̱ ji̱i̱ki̱ aju̱i̱niarta.

¹¹ Antsu Ámin enentáimturmas pujuinia nuka ashí warasarti. Ame wainiainiamu ásar ti warartamsar tuke kantamprútmawarti. Núnisaṉ Ame náarmin pachisar anenmainia ásar ti shiir enentáimturmasarti.

¹² Warí Uunt Yusá, Ámeka péṉker túrinia nuka shiir awajeame. Tura ayamkartutairmesha tantar ejakratna núnisaitme.