YKan. 49 - Yus Papí: Shuarja̱i̱ Yus Yamaram Chicham Najanamu

Iwiaakma sumaktincha kuit jeaachuiti

Kurái uchirí̱ aarma

^1-2 Ashí nuṉkanmaya̱tiram kuítrinniutirmesha tura kuítrinchatirmesha núnisaṉ kakarmatirmesha tura péejchatirmesha ashí métekrak ju̱ péṉker antuktarum.

³ Nekatai̱n chichastatjai. Kame enentái̱rja̱i̱ṉkia enentáimtai̱n títiatjai.

⁴ Nekatai̱n jintinkiartin chicham antukan nekaachmin jintíamuncha árpan túntuiyakun kantaja̱i̱ jintintiáttajrume.

⁵ Itiurchat tsawant naṉkamakuisha winia nemasur téntatrukmataisha ¿urukamtaik ashamkattaj?

⁶ Warí aya ni wariri̱ji̱a̱i̱ṉ ti kuítriniawar naṉkamantu enentáimtumainia

⁷ nu aentska yachi̱nkisha peṉké uwemtikrachminiaiti. Tura uwemtikrutrai tusa Yúsnasha akikchamniaiti.

^8-9 Warí iwiaakma sumaktincha kuítji̱a̱i̱ṉkia jeaachuiti. Kame nuna nekáa ukunmasha tuke játsuk iwiaaku pujusmij tusa wakerayataṉ peṉké wáinkiashtatna nuna nékawai.

¹⁰ Warí ni enentáimsaṉka nékassha jáiniawai tura nékachusha enentáimchasha jákarka ni kuítri̱n chikicha ikiurin áiniawai. Tu enentáimiui.

¹¹ Kame ni enentáimtumaskeka túketsuk iwiaaku pujutja tu enentáimiainiak nuṉke̱ncha ni náari̱niak anainiawai. Antsu ni je̱e̱nka iwiarnastatna nuí̱yaiti. Nui̱ tuke pujusártatui.

¹² Kame nu shuar kuítriniaitkiusha jákatin áiniawai. Warí, yajasma jainia ántsaṉ jákartatui.

¹³ Tura nisha esetar enentáimsacharmiayi. Tuma ai̱ṉsha ni írutramuri̱sha awajirar tí peṉker chichaawai tusa warasarmiayi. (Séraj)

¹⁴ Murikiu wáinin ni murikrí̱n matsamsatniunam yarumna núnis tuke jákaru matsamtai̱niam jákatniusha umichunka yarumeawai. Nui̱ umin ainia nuja̱i̱ nupetnakartatui. Kame tsawa̱a̱kui ni páantniuri̱nkia asaktuntrartatui. Tura tuke jaka matsamtai̱niam apujnasartatui.

¹⁵ Antsu tuke jákatniu kakarmari̱ya̱ Yus uwemtikrurtatui. Warí wíniaka Ni juruktiatui. (Séraj)

¹⁶ Amesha kuítrinia ni je̱e̱n ti waras pujakuisha suir iisaip.

¹⁷ Warí jákaṉka warirí̱n peṉké júkishtatui. Ni warasa pujutái̱ri̱ṉcha nui̱ṉ ikiuktiatui.

¹⁸ Yámaichik iwiaakna nui̱ṉ kuítrintin asan shiir pujajai tu enentáimtumawai. Kame nisha tí peṉker pujá asamtai aentsush núnisaraṉ shiir awajénawai.

¹⁹ Túrasha tsawái̱ tsáapnintri̱n peṉké wainkiachartin matsatainia nui̱ṉ jeattawai.

²⁰ Núnisaṉ enentáimcha nuka paant awajeam warawitkiusha yajasma jaka aya meṉká núnisaiti.