YKan. 48 - Yus Papí: Shuarja̱i̱ Yus Yamaram Chicham Najanamu

Úunt Akupniu pépruri̱ winchari̱

Kurái uchirí̱ jú̱ kantan kantampruáwarmai.

¹ Ii Yusri̱ pépruri̱n Ni akantúkma náintri̱nkia Uunt Yuska tí uuntaiti tura tí shiir awajú ajamainti.

² Kame arakaani̱ṉkia Seun naintkia nuṉka tesarma tí shiirmach asa ashí aents tí shiir enentáimtutainti. Nuka ti úunt akupniu pépruri̱ṉkiti.

³ Úunt akupniu pujutai̱ je̱a̱nmaṉka ejamtai̱ asa Yuska nekaamuiti.

⁴ Kame nuṉkaya̱ úunt akupin ashí irunturar ashintiukarmai.

⁵ Tura túmainian wáinkiar tsej ausha tiar kúntuts enentáimprar wárik pisarármiayi.

⁶ Nui̱ kurat achikiármai. Túrunawar nuwa̱ uchin takustaj tusa jatemá najaimiana núniarmai.

⁷ Etsa̱ tatainmaya̱ tsue̱r naseja̱i̱ Ámeka Társesnumia̱ kánuka ijiakéname.

⁸ Ashí Akupin Uunt Yus ii Yusri̱ pépruri̱nkia antukuitjinia nuka tímiatrusrik wáinkiaitji. Tura Yussha tuke péṉker wainkiattawai. (Séraj)

⁹ Maa Yusá, Ame Uunt Je̱e̱min Ame waitneṉkratairam enentáimtusuitji.

¹⁰ Maa Yusá, nuṉka náṉkatrana tímianaisha Amiin shiir awajsatniuka Ame náarmiji̱a̱i̱ métekete. Ame nekasa nuja̱i̱ métek péṉker túrutaiṉkia Ame untsuurumin piákuiti.

¹¹ Kame Seun naintkia warastatui. Tura Jutá nawantri̱sha Ame nekasa nuja̱i̱ métek sumamtikiakmin shiir enentáimprartatui.

¹² Tura Seunka werirum wekatúsrum téntaktarum túrarum kumpin je̱e̱sha nekapmartarum.

¹³ Kame ukunam aents matsamártatna nu ujakármi tusarum ni a̱a̱ya̱ tanishri̱sha wajasrum émamkesrum iistarum tura peṉkeri̱ je̱e̱ ainia nusha péṉker íirsatarum.

¹⁴ Warí ii Yusri̱ṉkia ukunmasha tuke íi Yusri̱ṉ átatui. Tura jákatniua nuna á̱a̱wini̱sha tuke péṉker juramkittiaji.