YKan. 47 - Yus Papí: Shuarja̱i̱ Yus Yamaram Chicham Najanamu

Uunt Yus ashí nuṉkanmaya̱n Úunt Akupniuri̱nti

Kurái uchirí̱ aarma

¹ Ashí nuṉkanmaya̱ aentstiram uwejmiji̱a̱i̱ pákeer awajtitiarum. Túrakrum warasma chichamja̱i̱ Yusak ti shiir wararsatarum.

² Warí Uunt Yuska ti uunt asa ashammainti. Kame ashí nuṉkanmaya̱n Úunt Akupniuri̱nti.

³ Ashí nuṉkanmaya̱n Ni nupetturmaktatji. Kame nuja̱i̱ umimtikiatniun tsaṉkatramkattaji.

⁴ Warí Yuska Jakupun aneak tí peṉkeran amastiniaitjiai tiniu asa nuja̱i̱ nupetkatniun suramsaitji. (Séraj)

⁵ Kame Uunt Yuska awakmaku asamtai ti wararainiak kachun umpuukiar nemarsarmiayi.

⁶ Nu asamtai Yus kantampruátarum. Kame Yus wararsarum nekas shiir kantampruátarum.

⁷ Warí Yus ashí nuṉka Úunt Akupniuri̱ asamtai nekas enentáimtusrum kantampruátarum.

⁸ ¡Maa, Yuska ni ti shiir pujutái̱ri̱n pujusuiti tura ashí nuṉkanmaya̱n akupeawai!

^9-10 Warí, ashí nuṉka kakarmari̱ṉkia Yúsnak áiniawai. Tuma asamtai ju̱ nuṉkanmaya̱ akupin ainia nusha Aprajáma Yusri̱n enentáimtuinia nuja̱i̱ pachintraru áiniawai. ¡Maa, aya Niṉki naṉkamantuiti!