YKan. 46 - Yus Papí: Shuarja̱i̱ Yus Yamaram Chicham Najanamu

Yúsaiti ii ejamtairi̱

Kurái uchirí̱ aarma

¹ Iin ayamprutmak ikiakátmajnia nuka Yúsaiti. Itiurchat pujakrincha wárik yáintmaji.

² Tuma asamtai nuṉka meseak naint yumpunkuisha ashamkashtatji.

³ Tura nayants tamparuk téter ajak náintian umuchiniakuisha ashamkashtatji. (Séraj)

⁴ Ashí Naṉkamantu Uunt Yus pujana nú péprunam entsa waana nu shiir enentáimtikiainiawai.

⁵ Yus nui̱ pujak ikiaká̱rtatui. Tsawant náṉkamkuisha tuke yáiṉtatui.

⁶ Aents itiurchatan matsamtusar charaatum ajainiamunam Yus chichaakuiṉkia akupniúrtiuk kuraṉkiar kaji̱niawai.

⁷ Antsu íiji̱a̱i̱ṉkia Ashí Akupin Uunt Yus Jakupa Yusri̱ya nú pujawai. Iiji̱a̱i̱ pujak ii ejamtairi̱nti. (Séraj)

⁸ Pai yamaikia Uunt Yus wakeramuri̱ji̱a̱i̱ nuṉká túrana ju̱ nekaatarum

⁹ mánitiai naṉkincha kupirainia nu tura mesetnum wetai káruncha áestuinia nu iitiarum. Nuna tura ashí nuṉka náṉkatka ímianai̱ mesetan iniaṉnakchaik.

¹⁰ “Wats Wíkitjiai Yus. Tee ajasa pujusrum nekaratarum. Ashí nuṉkanam aents írunna nuna Úuntri̱ntjiai.”

¹¹ Uunt Yus iiji̱a̱i̱ pujawai. Jakupa Yusri̱ ii ejamtairi̱nti. (Séraj)