YKan. 45 - Yus Papí: Shuarja̱i̱ Yus Yamaram Chicham Najanamu

Akupin nuatma

Kurái uchirí̱ aarma

¹ Péṉker chichamak winia enentái̱rui̱ṉkia piákuiti. Tuma asan winia akupniúrun kantamprajai. Winia iniai̱rusha shuar péṉkeran áakmauwa núnisaiti.

² Ashí aentsja̱i̱sha naṉkaamas ámeka tí shiirmaitme. Ámeka waitnenkartamu chichamja̱i̱ chichaaku asakmin Yus péṉkernum tuke yumiṉkrampraiti.

³ Maa kakarmá, ti páantin tura naṉkamantu asam ame puya̱rum emenmamata.

⁴ Mesetnum nupetmaku asam tura aya nekasa nu túrunati tusam wakerakum ti pachia asam nuyá̱ kakarmachu ainia nu ayamprúku asam tí paantniuitme. Tura untsuurum kakaram asamtai aentsti túrachminia nu túratin nekaattame.

⁵ Tura naṉkiram tí tsakapia nuja̱i̱ úunt akupniu nemasri̱ enentái̱ncha íjiuartatme. Túram untsurí aents nupetkartatme.

⁶ Yusá Ámeka tuke amutsuk akupniuitme tura akuptáirmiji̱a̱i̱ aya péṉkernak túriniaitme.

⁷ Péṉkera nu anenaitme tura yajauchia nuka muí̱jniuitme. Tuma asakmin Yus, ame Yúsrum ame írutramuram áiniana núja̱i̱ṉkia naṉkaamas waratai asuitiji̱a̱i̱ anaitiamkaiti.

⁸ Ame ashí entsatái̱rmesha mira kuṉkuinji̱a̱i̱ tura aruiji̱a̱i̱sha nuyá̱ kaní kuṉkuin ainia nuja̱i̱ ukuṉkámuiti. Tura akupniu je̱e̱ je̱a̱mkur yajasmá wajiṉkiji̱a̱i̱ je̱a̱mmanumia̱ṉ tuntuitiuar wararsamuitme.

⁹ Kame úunt akupniu nawantri̱ ame shiir awajniuitmena nu pujurtámainiawai. Tura untsuurumiiṉkia nua̱ram Upir nuṉkanmaya̱ kurin iwiáa iwiarmamu ajasu wajawai.

¹⁰ Nua̱ru, wi títiatjamna nu péṉker esettsam antukta. Tura amé shuarsha nuṉkemsha kajinmátkitia.

¹¹ Kame shíirmach asakmin úunt akupin wakerutmaktatui, níyaiti ame úuntrum. Tuma asamtai enentáimtusta.

¹² Tírunmaya̱ nuwa̱ wariṉkísha amastaj tusar tarutrámartatui. Tura kuítrinniusha waitnenkarturta tusa seatmartatui.

¹³ Maa, akupniu anajmarmari̱ṉkia tí shiirmaiti. Tura ni pushiri̱ṉkia kuri anujturmaiti.

¹⁴ Tímiatrunas iwiarmampramurtiuk akupniúnam junaktiatui. Tura nuwa̱ áishmaṉja̱i̱ tsaniṉcharu némarkainiak itiartámartatui.

¹⁵ Ti shiir wararas itiar akupniu je̱e̱n waya̱wartatui.

¹⁶ Kame we̱a̱trum túrunawarmia núnisaṉ uchirmesha túrunawartatui. Kame ashí nuṉkanam akupniu uchirí̱ awajsartatme.

¹⁷ Ame tiraṉmi tiraṉki̱ ártatna nunasha ámin tuke enentáimtiarat tusan jintintiáwartatjai. Túramtai ashí shuar tuke shiir awajtámin ártatui.