YKan. 42 - Yus Papí: Shuarja̱i̱ Yus Yamaram Chicham Najanamu

Wi kitiamajna tímiatrusan Yusan enentáimtajai

Kurái uchirí̱ aarma

¹ Japa entsan e̱a̱k jan jan ajana tímiatrus wikia Yusá e̱a̱jme.

² Wikia kitiamana tímiatrus Yusá enentáimtajme. Kame ¿wenasha urutáik Yusai̱ wajasaintiaj?

³ Tuke tsawant chichartuiniak “¿Ame Yusrumsha tui̱ pujá?” turutainiakui winia nea̱jkirka tsawai̱sha tura káshisha winia yurumkaruiti.

⁴ Untsurí aentsun yaruakan warasan kantamkin we wémiajai. Yumiṉsajme tusar nampernum ti untsurí írunna ímiatrusnak wi émtukan Yusa Je̱e̱n niji̱a̱i̱ we wéarmiajai. Nuna enentáimsan winí̱ init winia wakantrui̱ṉkia ukanájai.

⁵ ¿Urukamtaik jakamnia nekaprancha tura tí waitsancha pujustataj? Túrasha winia enentái̱ru ¿urukamtai jakamnia nekapramsha winí̱ initiaani̱sha wáitiam? Yus enentáimtakum nákasta. Ánkisha winia Yúsruiti tura uwemtikruru asamtai tuke shiir enentáimtustatjai.

⁶ Winia Yusru winia enentái̱r tí waitias pujurtawai. Túrasha Irmun naint tépetra írunna nuyá̱ tura Misar náinniumia̱sha Jurtan nuṉka ímianai̱ pujayatnak Áminkia enentáimtu pujuttajai.

⁷ Tuna írunna nuka kunanam iniak nuamtak chichainiawai. Chíchimiuram tura tamparum winí̱ naṉkatusaru áiniawai.

⁸ Tsawái̱ Uunt Yus waitnenkartutairi̱n akuptiatui tura káshikia Nin kantamprittiajai. Yus iwiaaku pujustinian winia surakui Nin tuke seattajai.

⁹ Yusan chicharkun “Winia kátsuram kayaru ¿urukamtai winiasha kajinmátruknium? ¿Urukamtai winia nemasur wáitkiarainiakuisha wisha uutú wekaitiaj?”

¹⁰ Winia ukunchur najamáiniai̱ṉ, winia nemasur wishikruiniak tuke tsawant chichartuiniak “Ame Yusrumsha ¿tui̱ pujá?” turutainiawai.

¹¹ ¿Urukamtaik jakamnia nekaprancha tura tí waitsancha pujustataj? Túrasha winia enentái̱ru ¿urukamtai jakamnia nekapramsha winí̱ initiaani̱sha wáitiam? Yus enentáimtakum nákasta. Ánkisha winia Yúsruiti tura uwemtikruru asamtai tuke shiir enentáimtustatjai.