YKan. 41 - Yus Papí: Shuarja̱i̱ Yus Yamaram Chicham Najanamu

Jáakur kúntutsja̱i̱ Yus seamu

Tawit kantamtikiatniun áaruiti.

¹ Kuítrincha nuna waitnenniuka warasti. Tuma asamtai itiurchat pujakuisha Uunt Yus yáiṉtatui.

² Tura Uunt Yus wainiu asa ju̱ nuṉkanam waras pujusat tusa tsawantri̱n éketkattawai. Tura nemasri̱ ní wakeramun túrawarat tusasha tsaṉkatkashtatui.

³ Kame jaak najaimiá tepamunmaya̱sha Uunt Yus ikiaká̱rtatui. Tura ni jáamurmiya̱sha Amek ayap awajsattame.

⁴ Tura wi Yusan seakun “Uunt Yusá, Amiin yajauchin túraitjiai. Túmaitkiuisha winia waitnentruram tsuárata” tímiajai.

⁵ Winia nemasrusha yajauch chichartuiniak “¿Urutáiṉ jakasha meṉkakat?” turutainiawai.

⁶ Nuyá̱ iirsattsa káutruiniaksha wáitian ujatainiawai. Túmainiak niṉki ni enentái̱n awajmamainiawai. Tura a̱a̱ jíinkiar ántuiniamunam nu yajauchin paant awajainiawai.

⁷ Ashí winia nakitruinia nú iruntrar yajauch enentáimtursar chichartuiniak

⁸ “Tsuámarchamnia suṉkurja̱i̱ jaak peaknum teperusha ¿itiur péṉker ajastiṉᵏⁱ?” turutainiawai.

⁹ Winia tí peṉker amikiur péṉker enentáimtiniuj nu tura wiji̱a̱i̱ yurumniu nuke íksaṉ nemasur ajasmai.

¹⁰ Túrasha Uunt Yusá Ame waitnentruram iniantuktia. Túrutawakminkia wisha yapajmiáktaj.

¹¹ Ju̱ja̱i̱ shiir enentáimtikruruitmena nuna nekaattajme tura winia nemasrusha nupetkajai tusa kantamprutacharti.

¹² Tuke nekas túratniua nuna túrati tusam tuke wáitkiaitme. Túram Amiin eem tuke pujusat tusam najatamiame.

¹³ Uunt Yus Israera Yusri̱ tuke shiir awajsamu atí. Tura uwir uwir núnisaṉ tuke ti shiir awajsamu atí. Nekas nuke atí.